Mizoram sorkar enkawl high school-ah Zirtirtu pakhatin zirlai 10.61 an enkawl

School Education department SPIO-in a tarlan danin, Mizoram district pariatah Mizoram sorkar enkawl high school (H/S) 198 a awm a, chu'ngah chuan zirlai 13,566 leh zirtirtu 1,279 awmin, zirtirtu pakhatin zirlai 10.61 zel enkawl ang an ni.

RTI Act hmanga zawhna chu School Education SPIO-in a chhanna June 10, 2019-a a pe chhuak a, zawhnate chu September 30, 2017 dinhmun anga chhan a ni. Aizawl district-ah H/S 65 awmin, Aizawlah 29 leh thingtlangah 36 a awm a; Aizawl khawpuia H/S-ah zirtirtu tam deuhna awm mah se, zirtirtute chu zirlai zat nena enin a rual thawkhatah ngaih a ni.

Aizawl khawpui chhung leh a bul hnaia sorkar H/S zingah zirlai 80 tlin lohna sikul 15 a awm. Melriat H/S-ah zirlai 37 leh zirtirtu pakua awmin, zirtirtu pakhatin zirlai 4.11 enkawl ang an ni a, Bungkawn H/S-ah zirlai 39 leh zirtirtu 12 awmin, zirtirtu pakhatin zirlai 3.25 zel enkawl ang an ni. Zirlai 40-50 inkar nei H/S paruk a awm a, chu'ngte chuan zirtirtu 6-10 an nei hlawm. Zirlai 50-80 inkar nei sikul an awm a, chu'ngahte chuan zirtirtu 9-13 inkar an awm.

Aizawl district-a thingtlang khaw 36-ah sorkar H/S a awm a, thingtlang H/S-ahte hian zirlai dinhmun enin zirtirtu an rualkhai thawkhat rualin, zirtirtu nei tlem fál erawh an awm. Zirtirtu awm tlemna ber Zohmun H/S-ah zirtirtu pathumin zirlai 70 enkawlin, zirtirtu pakhatin zirlai 23.33 (1:23) zel enkawl ang an ni.

Phuaibuang H/S-ah zirtirtu paliin zirlai 88 (1:22) an enkawl a, National H/S, Phullen-ah zirtirtu parukin zirlai 84 (1:14) an enkawl. Tlungvel H/S-ah zirtirtu paliin zirlai 92 (1:23) an enkawl a, Tuisualral H/S-ah zirlai zirtirtu pangain zirlai 121 (1:24.2) an enkawl bawk.

Lunglei district-ah sorkar H/S 34 a awm a; zirlai 100 chuang awmna H/S panga a awm. Zirlai tam berna Lunglei H/S, Chanmari-ah zirlai 226 awmin, zirtirtu 20 an awm a, zirtirtu pakhatin zirlai 11.3 zel enkawl ang an ni a; zirtirtu tlem berna Cherhlun H/S-ah zirtirtu pakhat a awm a, zirlai 59 an awm thung.

Siaha district-ah Mizoram sorkar enkawl high school pakua a awm. Zirlai nei tam ber Saiha H/S-ah zirlai 151 awmin, zirtirtu pariat (1:18.87) an awm a; Tuipang H/S-ah chuan zirtirtu pathumin zirlai 80 an enkawl a, zirtirtu pakhatin 26.67 enkawl ang an ni.

Champhai district-ah sorkar H/S 30 a awm a, zirlai za chuang nei sikul panga an awm. Zirlai tamna ber Gandhi Memorial H/S, Champhaiah zirlai 185 awmin, zirtirtu pakua an nei a, zirtirtu pakhatin zirlai 20.55 enkawl ang an ni. Khawbung H/S-ah zirtirtu panga leh zirlai 116 (1:23.2), Khawzawl H/S-ah zirtirtu pasarih leh zirlai 139 (1:19.86), Mizo H/S, Khawhaiah zirtirtu pali leh zirlai 140 (1:35), Ngopa H/S-ah zirtirtu panga leh zirlai 119 (1:23.8) an awm.

Kolasib district-ah sorkar high school 13 a awm a, zirlai za chuang awmna T Robert H/S, Bilkhawthlirah zirtirtu pathum leh zirlai 114 an a, zirtirtu pakhatin zirlai 38 zel enkawl ang an ni. District chhunga H/S dangah erawh chuan zirlai leh zirtirtu an rualkhai thawkhat.

Serchhip district-ah sorkar H/S 15 a awm. Zirlai za chuang awmna sikul pakhat, Chhiah­tlang H/S chiah a awm a, zirlai 102 awmin, zirtirtu pasarihin an enkawl (1:14.57) a; chutih laiin, Chhiahtlang H/S aia zirlai tlem zâwkna H/S pangaah chuan Chhiahtlang H/S aiin zirtirtu an tam zawk vek thung.

Lawngtlai district-ah sorkar H/S 17 a awm a, zirlai 100 chuang awmna sikul pali a awm. Ramthar H/S, Lungpherin zirlai ngah berin, 125 an nei a, zirtirtu 10-in an enkawl. Mamit district-ah Mizoram high school 15 a awm. Zirlai za chuang awmna sikul pahnih a awm a; zirlai tamna ber Marpara H/S-ah zirtirtu pali leh zirlai 161 (1:40.25) an awm a; Mamit H/S-ah zirtirtu pariat leh zirlai 136 (1:17) an awm. Sorkar H/S dang 13-ah chuan zirlai leh zirtirtu an inrualkhai thawkhat a ni.



Share this Post

Login to comment
No Comments