CM hlui Laldenga hriatrengna hun hman a ni

Mizoram chief minister hlui leh sorkar lai MNF party dintu Laldenga thih champha pualin nimin zing khan Aizawl Treasury Square-a a thlanah hun hman a ni a, a nupui Lalbiakdiki leh chief minister Zoramthanga te bakah, sorkar hotute leh MNF hruaitute'n hriatrengna pangpar an dah.

CM Zoramthanga chuan, MNF-in sorkarna a siam leh hnua a vawi khatna atana Laldenga thlàna hun hman a ni chu lawmawm a tih thu a sawi a, "Hnam anga Pathian chawimawi a, pár chhuak a, hnam thinlung kan hnena tarlanga min kawhhmuh turin Pu Laldenga a kai chhhuak a, a chawimawi a ni. Kan hnam leh sakhua a him a, hnam anga kan dinchhuah theihna tura hnam thinlung kan put theih nan min kaihruaitu atan Pathianin 

Pu Laldenga hi min pe a ni," a ti.

MNF President chuan, "Laldenga kaltlangin Pathianin hnam thuthlung ropui tak 'Pathian leh kan ram tan' tih hi min pe a, hei hi sorkar kan kalpuinaah te, mipuite nen kan indáwrnaah te, ram dangte nen kan indáwrnaah te, kan kal sual dawn pawhin, kawng dika kan kal theihna tura min hruaitu atan nghet takin kan vuan tlat tur a ni," a ti.

Laldenga nupui Lalbiakdiki pawhin thu sawiin, kum 29 chhung kum tin a pasal zahna leh hriatrengna hun Zoramthanga kaihhruaia hman a ni ṭhin chu lawmawm a tih thu a sawi a, "Pathian min hruaina leh Zoram mipui zarah sorkarna kan han chang lehte hi a lawmawm hle. Tun sorkara minister leh MLA-te hi an ropui ka ti. Ka pasalin a sawi fo, ṭhangthar lehkhathiam leh mi fel tak takin ram leh hnam an kaihruai hi a thlamuanthlak ka ti tak zet a ni," a ti.

Laldenga thih champha tak chu July 7 a ni a, Pathianni a nih avangin nimin zing dar 7 khan a thlanah hun hman a ni. Inkhawm tawi an neih chu MNF vice president 

R Tlanghmingthanga'n a kaihruai a; minister, MLA leh AMC councellor eng emaw zat an tel.

Laldenga hi July 11, 1927-ah Lunglei Pukpuiah a piang a, kum 1944-ah British Indian Army a zawm. Kum 1959-ah Mizo National Famine Front a din a, chu chu October 22, 1961-ah Mizo National Front (MNF) tia thlak a ni. Kum 1986-a Mizoram sorkar lailâwk (interim government)-ah chief minister a ni a, kum 1987-a Mizoram state Assembly inthlan hmasa berah Sateek bial leh Aizawl North-II bial aṭanga thlan tlin niin, Mizoram state-a Chief Minister hmasa ber a ni.

Kum 1990-ah cancer a nei tih hriat a ni a, Memorial Sloan Kettering Cancer Centre, USA-ah thla thum enkawl a nih hnuah, Mizoram panin an haw a; an haw kawngah Ashford Hospital, London-ah July 7, 1990, India sanaa tlai dar 2:30-ah a thi. A ruang chu July 11, 1990-ah an in thlenpui a ni a, July 13-ah vui niin, tun thlengin Mizo zinga state funeral-a vui awmchhun a ni.



Share this Post

Login to comment
No Comments