MPYCC-in ṭawng ûm pha lo-ah sorkar puh

Mizoram Pradesh Youth Congress Committee (MPYCC) chuan thuchhuah siamin, Mizoram sorkarin thisen lakna hmanruate tun thlengin blood bank-te tan an la lei loh avangin blood bank ṭhenkhatin an duh angin donation camp an neih theih loh thu an tarlang a; MNF kaihhruai Mizoram sorkar chu an ṭawng ûm pha loah an puh.

Congress party ṭhalaite chuan, MNF-in sorkarna an siam hlimchhawn, January 10, 2019-a Council of Ministers meeting-ah blood processing fee lak mek an titawp a, chumi atana kum khata senso ngai cheng nuai 200-300 pawh budget session hmasa ber (March thlaa neih)-ah khung nghal tur a nih thu an sawi tih an tarlang a ni.

MPYCC chuan, Mizoram sorkar chu a intiam angin March thlaa budget session-ah blood bag leh hmanraw dang leina atan sum an dah lo tih sawiin, "Tun hma aṭanga an lo innghah tawhna MSACS aṭang­in blood bag leh hmanraw dang emaw leina tur sum an dawng lo a, sorkar hmasain renchem taka sum a lo khawl sa aṭangin an la kal thei ṭâwk ṭâwk a ni. District hospital hrang hranga blood bank-te'n thisen lakna bung­rua duh khawp an neih loh bakah, blood donation camp nei duhte pawh an neihpui thei lo fo a ni," an ti.



Share this Post

Login to comment
No Comments