Phek 1na chhunzawmna Polythene khap tur zâwm turin mipui ngen

Mayor chuan, Mizo mipuite'n plastic leh a kaihhnawih thilte an ning tawh hle nia an hriat thu sawiin, "Plastic leh a kaihhnawihte hi kan environment tichhetu a ni tih kan hre chiang tawh. Plastic lam chi hman tlem a nih theih nan AMC hi chu a bul ṭantu kan ni mai a, mipui hi a pawimawh ber zawk chu an ni," a ti a; hnatlangpui aṭang ringawt­in plastic bag khap tur chu 30% velin a hlawhtling nghala a hriat thu leh hlawhtlinna chu 50% a tlin thuai a rin thu a sawi.

PC Lalhmingthanga chuan, polythene pan chi khap hunah a thlakna tur pawh an ngaihtuah zel dawn thu sawiin, "Dawr hrang hrangte pawhin polythene thlakna tur an ngaihtuah ṭanin kan hria a, a lawmawm. Polythene kan hman uar hmain kan lo bazar tawh ṭhin a, kha'ng hun laia bag kan hman ṭhin ang kha i hmang uar leh ang u," a ti.

Aizawl Mayor chuan, polythene chhah lam (micron) tehna khawl pahnih an chah mek thu leh a ṭul chuan an chah belh tur thu sawiin, dawrah kal kualin plastic bag-te an teh ṭhin dawn thu a sawi a; tehnaa tling lote chu mansak nghal lam ni loin, a tling ngei hmang tura zirtir lam an uar phawt tur thu a sawi bawk.

AMC deputy mayor Lalringliana chuan, AMC-a an awm tirh lamah chuan cheng vbc. 12 vel basic grant-ah an neih thu sawiin, "Chuta ṭanga 30% vel chu bawlhhlawh paih nan kan hmang. SIPMIU-in bawlhhlawh paihna tur an siam mek a, an inpeih hunah bawlhhlawh paih dan ṭha zawkin kan paih thei ang, an peih hun kan nghakhlel hle a ni," a ti.

Inkhawmah hian Panaji khawpuia plastic bag khap dan enfiaha kal zinga mi Zonunsanga Khiangte, MJA president-in an zinna leh an thil hmuhte a sawi a; zinnaa tel MJA member dang­te leh AMC councillor dangte'n thu an sawi bawk.



Share this Post

Login to comment
No Comments