Hmun hrang hrangah Green Mizoram Day hmang

Nimin khan Mizorama district khawpui tinah leh khaw dang leh hmun dang ṭhenkhat­ahte Green Mizoram Day hman a ni.

District headquarters-a an hmannaah kumina kângmei ven kawnga thawk ṭha khuate hnenah lawmman hlan a ni a, pakhatna khuate'n Rs. 50,000 ṭheuh, pahnihnate'n Rs. 30,000 leh pathumnate'n Rs. 20,000 ṭheuh an dawng.

Lungleiah chuan Green Mizoram Day hi 2nd Bn. MAP Complex-ah hman a ni a, Lung­lei DFO Dr C Vidhyasagar chuan kaihruaiin, Lunglei bawrhsap K Lalrinzuali chu khuallian a ni. Lunglei ACF C Lalthan­kima sawi danin, nikum Green Mizoram Day pualin thing ṭiak 346 an phun a, district pumah thing ṭiak 16,114 sem a ni.

Lunglei district-a kângmei veng ṭha khuate hnenah lawmman hlan a ni a, pakhatna Zobawk South, pahnihna Darzo leh pathumna Ṭawipui South an ni. Chanchinbu tiṭhate hnenah lawmman hlan a ni bawk a; pakhatna Zochhiar, pahnihna Hlimthla leh pathumna Zunzam-te an ni.

Siahaah chuan DC pisa tualah hman a ni a, MADC executive member (Forest) F Lawmkima khuallian a ni. MADC Forest RO Beichatlaisa tarlan danin, nikuma Green Mizoram Day pualin thing ṭiak 2,500 sem a ni a, kuminah thing ṭiak 1,500 sem a ni dawn.

Siaha district-ah chuan Saikao chu kângmei veng ṭha ber khua an ni a, Theiri chu pahnihna niin, pathumna chu Laki khua an ni. Inkhawmah hian MADC-a Forest department-in thing ṭiak an sem nghal a, thing an sem tam berte chu Ngiau, Tlaizawng, Thlado leh Silver Oak-te a ni. Nikum chhung khan Siaha district-ah kângmei vawi 89 a chhuak a, ram hectare 173-a zau a kâng tih an tarlang.

Green Mizoram Day hi Champhaiah chuan New Champhai community hall-ah district bawrhsap Dr Naveen Aggarwal-i'n a hawng. DC chuan, Green Mizoram Day puala hnatlangte chu thing ṭiak phun chauha duhtawk loin, a enkawl leh venhim kawnga ṭan la chhunzawm turin a chah.

Champhaiah hian an district-a kângmei veng ṭha khuate leh thawh hlawkte hnenah lawmman hlan a ni a; kangmei veng ṭha khuate chu - pakhatna Biate, pahnihna Khawbung South leh pathumna Neihdawn an ni. Chanchinbu thawh hlâwkte chu - pakhatna Khawzawl Times, pahnihna Rihlipui leh pathumna Pasalṭha te an ni.

Sorkar department leh zirna-in thing phun leh humhalh ṭha ber Champhai DIET, pahnihna KLTM High School, Ngopa leh pathumna Ruantlang M/S-te an ni a; nikuma Green Mizo­ram Day puala thing phun tam leh enkawl zui ṭhate chu - pakhatna Agriculture leh FCSCA, pa­hnihna School Education leh pathumna Fisheries leh Transport department-te an ni.

Kolasib-ah chuan district bawrhsap Zoengsanga hoin Green Mizoram Day hi Parish Hall-ah hman a ni a; DC chuan mipuite chu thing leh mau tichereutu ni lo a, a humhalhtu nih tum turin a chah. Kolasib DFO Lalnun­zira tarlan danin, nikuma Green Mizoram Day pualin Thingdawl Nursing School campus-ah thing ṭiak 164 phun a ni a, Kolasib khawpui leh a chhehvelah thing ṭiak 17,370 phun a ni.

Kumina kângmei laka ramngaw veng ṭha ber Khamrang an ni a, pahnihna North Chhimluang leh pathumna North Hlimen an ni. Green Mizoram Day-ah Kolasib khawpui leh a chhehvelah thing ṭiak 17,370 phun a nih tawh thu an tarlang a; nimina inkhawm zawhah St. John HSS campus leh Thingdawl Nursing Home-ahte thing ṭiak ṭhahnem tak an phun.

Serchhip district-ah chuan Serchhip District Committee on Green Mizoram thurel angin Serchhip leh Thenzawlah hman a ni a, Serchhip leh Thenzawl inkar kawngpuiah leh Thenzawla Golf Course complex-ah thing phun hna­tlang neih niin, thing ṭiak 970 an phun. A hawnnaah Serchhip DC Sangchhin Chinzah khuallian a ni.

Serchhip district-a kângmei veng ṭhate hnenah lawmman hlan a ni a; pakhatna Keiṭum, pahnihna Léng leh pathumna Chhingchhip Mualpui-te an ni. Serchhip aṭanga chhuak ni tin chanchinbu, kângmei ven kawnga mipui zirtirna lam hawi ti­chhuak ṭhate hnenah lawmman hlan a ni bawk a; pakhatna Zothlifim (Rs. 5,000), pahnihna Lamkal (Rs. 3,000) leh pathumna Ramlai Arsi (Rs. 2,000) an ni.

Green Mizoram Day hi Lawngtlaiah chuan DC pisa tualah hman a ni a, Lawngtlai College principal T Thangṭhuama khuallian a ni. LADC sorkara DCCF K Lalromawia sawi danin, Lawngtlai district-ah hian kum 2000 aṭangin Green Mizoram Day hman a ni a, nikum Green Mizoram Day-a an thing phun 377 zinga 70% vel a nungah an ngai.

Lawngtlaiah hian an district-a kângmei veng ṭha khuate hnenah lawmman hlan a ni a; pakhatna Vawmbûk, pahnihna Lawngtlai College Veng leh pathumna Saizawh East-te an ni. Green Mizoram Day 2019 thutiam an chham rual a, sorkar department hrang hrang, YLA leh MJA-te'n Mampui kawngah thing ṭiak 340 vel an phun bawk.

Green Mizoram Day hi Mamitah chuan Chhimveng YMA Hall-ah hawn a ni a, additional DC Jacob Lalawmpuia khuallian a ni. Jacob Lalawmpuia chuan, Mamit district-ah kum 1999 aṭangin Green Mizoram Day hman a nih thu leh Day pualin thing ṭhahnem tak phun a nih tawh thu sawiin, mipuite chu an thing phunte enkawl zui tur leh kumina thing an phunah a len huna hnawksak lo tur ngaihtuah turin a chah.

Mamit district-ah hian kângmei veng ṭha ber khua chu Reiek an ni a, Pukzing leh South Sabual-te chu pahnihna leh pathumna an ni. Mamit DFO Lalnunsanga Khawlhring chuan, kum 1999 aṭanga 2018 thlengin Mamit leh a chhehvelah Green Mizoram Day pualin thing ṭiak 1,07,477 phun nih tawh thu leh, kuminah chuan NH-44A kawngpui dungah thing ṭiak 450 phun tum a nih thu a sawi.



Share this Post

Login to comment
No Comments