Polythene khap tur zâwm turin mipui ngen

Aizawl Municipal Corporation (AMC) mayor PC Lalhmingthanga chuan, June 7, 2019-a Aizawl khawpuia polythene bag bawlhhlawh thenfai hnatlangpui an huaihawtah mi 64,000 vel an hnatlàn thu a sawi a; August 1, 2019 aṭanga Aizawl khawpuia plastic bag pan chi (polythene) khap tur chu ṭha taka zàwm a, AMC hmalakna ṭawiawm turin mipui a ngen.

AMC hian tun hnai khan Aizawla MJA member mi pakuate chu Goa khawpui Panaji (Panjim)-a plastic bag khapna an kalpui dan zir chiang turin a tír a. MJA member-te'n an zinna report pek inkhawm nimin khan Aizawl Press Club-ah huaihawt a ni a, Aizawl Mayor leh AMC hotu dangte leh MJA member-te an tel.

PC Lalhmingthanga chuan, June 7-a plastic bawlhhlawh thenfai hnatlangpui an buatsaih chu a hlawhtling hle tih sawiin, "Local council hnatlangte kan tlawh kual char char a, Inrinnia hnatlang ta zawk leh nimin (Thawhṭanni)-a hnatlangte pawh an awm. Hnatlang zawng zawng kha mi 64,000 vel kan ni," a ti a; Aizawl khawpui páwn lama khaw hrang hrangah mi 3,000 chuang an hnatlan bawk thu a sawi.

AMC Mayor sawi danin, hnatlangpuiah khan truck trip 100 dáwn plastic bawlhhlawh an paih. Veng pakhata hnatlang tamna ber chu Dinthar niin, mi 2,345 an hnatlang a; Ramhlun North-ah mi 1,200 leh Khatlaah mi 1,050 an hnatlang bawk.



Share this Post

Login to comment
No Comments