Group B chin sorkar hna lak Sorkarin MPSC a chhuhsak dawn

Mizoram Public Service Commission (MPSC)-in Mizoram sorkara thawk tur lakna a khawih ṭhin zinga group B (non-gazetted) chin chu MPSC hnen aṭanga laksak Council of Ministers ṭhukhawm chuan a rel. Group-B (non-gazetted) chin hnuai lam hna thawk tur lakna buaipui turin board thar din an rêl nghal.

Sorkar thuchhuah tarlan danin, Chief minister Zoramthanga hoa Council of Ministers June ni 10-a meeting hian MPSC kaltlanga hna lak tam lutuk chhâwk zângkhaina atan leh an hna lak leh thawh turte a hun tak zela an lak theihna atan Group-B (non-gazetted) recruitment chu MPSC mawhphurhna aṭanga lak chhuah an rêl a; MPSC aṭanga lak chhuahte khawih turin Mizoram Subordinate Services Selection Board din an rél a ni.

Cabinet meeting chuan Mizoram Subordinate Services Selection Board (MSSSB) din turin thutlukna an siam nghal a; Cabinet thutlukna ang chuan, MPSC-in sorkar hnathawk group-A chin chiah an la tawh ang.

Cabinet thutlukna chung-changah hian Vanglaini palai zawhna chhangin MPSC hotute chuan, sorkar hna Group-B turte lak hna an kuta a awm tawh loh tur thu chu hriattir an la nih loh thu an sawi a, "Hna lakah harsatna kan neih kan hre lo. Mahse, thawktu kan indaih lo a, ṭhenkhat chu zan thlengin hna an thawk ṭhin. Kumin chhung hian hna la turin kan calendar a full vek tawh a ni," an ti.

MPSC hotute sawi danin, Mizoram sorkar chu hna lâkah a insúm ngar ngar a, department ṭhenkhat chuan harsatna an tawk. Hei vang hian kum 2015 vel khan sorkar chuan khatih laia principal secretary Renu Sharma kaihhruaina hnuaiah committee a din a, committee chuan sorkar hnathawk lak dan tur leh department indaih lohnate an zir chiang a ni.

Renu Sharma kaihhruai committee chuan kum 2016 khan sorkarah report an thehlut a, chumi hnuah sorkar hnathawk lak thar tur a tam zual.

Tun hma chuan MPSC-ah indaih lohna vak a awm lo a, hna lak thar tur a tam hnuah an indaih ta lo deuh. MPSC hian December 9-12, 2019 thlenga hna lakna atana exam buatsaih turin calendar an siam lâwk a ni.

Tun dinhmunah MPSC hian grade pay 4,200 (UDC leh a tlukpuite) chin chung lam thawk tur lakna (recruitment) an khawih mek a, tunah pawh UDC leh a tlukpui lak tur eng emaw zat tihfel tawh an nei.

Zawhna chhangin MPSC hotute chuan, "Engtin nge group B chin lak tura kan tihfel tawhte hi kan kalpui dawn kan hre lo. Sorkar thu thu a ni a, anni'n la tura min tih chin kan la mai turah kan ngai," an ti.

Cabinet-in an pawm dangte

lSinlung Hills Council inthlan neih thuai theih nan The Mizoram (Election to Sinlung Hills Council) Rules, 2019.

lMizoram House, Guwahati-a mipui indaih lohna chhâwk zângkhai turin sak belh emaw, ram lei belh rawtna chu a thuphungin an pawm.

lGovernment of Mizoram (Allocation of Business) Rules, 2019 an pawm. He Rules hi department hrang hrang hna chan pual siam ṭhat ngaite siam ṭhatna tur a ni.

lThe Mizoram Clinical Establishments (Registration & Regulation) (Amendment) Rules, 2019 an pawm.

lThe Mizoram Drug Treatment cum Rehabilitation Centre (TRCs) Accreditation Rules 2019 an pawm. Hei hi tuna Mizorama ruihhlo ngaite enkawlna hmun mimal din 40 vel awmte'n rualkhai leh mumal taka inkaihhruaina fel tak an neih theih nana duan a ni.

lMizoram Youth Commission hnathawh chungchanga kaihhruaina fel tak neihna atana siam Draft Mizoram Youth Commission Rules, 2019 an pawm.

lThe Mizoram (Land Revenue) (Amendment) Bill, 2019 an pawm. The Mizoram (Land Revenue) Act, 2013 siam ṭhatna atan tih a ni a, ram lei leh hralh chungchangah mipui tana samkhai zawkna thlen a, sorkar pawhin awlsam leh felfai zawka hna a thawh theihna tura tih a ni.



Share this Post

Login to comment
No Comments