Kolasib-ah sorkar hmalakna thlir let a ni

Kolasib District Level Coordination Committee chu nimin khan district bawrhsap Zoengsanga hoin DC conference hall-ah an ṭhukhawm a, sorkar department hrang hrangte hmalakna an thlir lêt.

Zoengsanga chuan, pisa kai hun leh haw hun atana sorkar thupek zawm chu sorkar hnathawkte mawhphurhna a nih thu sawiin, "Sorkar hna kan thawh chhan chu mipui an ni. Tu pawh office dawr tura rawn kal reng rengte hawihháwm taka lo dawnsawn a, an mamawh leh harsatna neihte sutkian dan tur lo dappui a, lo ṭanpui hi sorkar hnathawkte tihmâkmawh a ni," a ti.

Chawlhkar tàwpa Aizawla haw chung­chang sawiin Kolasib DC chuan, "Kar tâwp pawh ni se, hna emaw, thil ṭul vanga inkoh thut a awm thei a, phalna la hmasa lo leh chhuanlam fahrah tê tê hmangin station chhuahsan fo loh tur a ni," a ti a; mahni hnathawhna hmuna awm ṭhat chu sorkar hnathawkte mawhphurhna a nih thu a sawi.

Meeting-a tarlan danin, Environment, Forest and Climate Change department-in kawng hrang hrang aṭangin sorkar kum liam ta khan cheng nuai 133 vel hmuin, sum hmu tam ber an ni a; Land Revenue & Settlement department-in registration fee leh stamp duty aṭangin cheng nuai 21.15 an la lut.

Bilkhawthlir RD Block chuan scheme pathum - MGNREGA, PMAY(G) leh NRLM/MzSRLM an kalpui a, MGNREGA hian khaw 36 huamin job card 12,911 pek chhuah a ni a; MzSRLM chuan V/C 22 a huam thung.

Agriculture department-in NEDP hnuiah cheng nuai 1,037 an dawng a, item 14 thawhna atan hman turin CSS hnuaiah cheng 91.318 an dawng bawk. Sumte chu kut hnathawkte mamawh phuhrûk nan leh ṭanpui nante leh hnathawh nan hman a ni.

Kolasib Chief Medical Officer tarlan danin, Kolasib district-a infant mortality rate (IMR) chu 24 (nausen 1,000 zelah pakhat thi tihna) a ni a, hei hi state pumpui IMR aiin a hniam zawk. Tun dinhmunah naupang kawṭhalo hri danna - rota virus vaccine pe turin hmalakna peih ṭêp a ni.

Meeting-ah hian Kolasib district ṭhalaite'n zirna kawnga hma an sawn dan tur ngaituaha sawihona hun hmang turin June 17 an rua­hman a, sikul hrang hranga headmaster/principal, college principal, DIET, YMA hruaitute, V/C leh MJA-te sawm ni se, an ti.



Share this Post

Login to comment
No Comments