E-hospital hman thuai dan tur sawiho

National Informatics Centre, New Delhi hnuaia Mizoram state coordinator Seemantinee Sengupta, scientist-G chuan nimin khan Serchhip a tlawh a, district bawrhsap Sangchhin Chinzah leh district informatics officer Lalruatmawia Zadengte nen e-hospital hman thuai a nih theih dan tur an sawiho.

Sangchhin Chinzah chuan, inthlan leh sorkar hmalakna kawng tam takah NIC ṭangkai taka hman a nih ṭhin thu Seemantinee Sengupta a hrilh a, "NIC tihhmasawn zelna kawngah district thuneitute'n theihtawp chhuah a, lo ṭanpui kan inhuam a ni," a ti.

Seemantinee Sengupta hian Serchhip district hmasawnna atan district hospital-ah e-hospital kalpui tum a nih thu sawiin, "Damlo enkawl tawhte medical record awlsam tak leh rang taka en lêt mai theih a ni dawn," a ti a; e-hospital chuan thawktute a puih theih thu a sawi.

Land Revenue & Settlement department-te'n land record an neihte pawh computerise vekna tur ‘e-ram’ an buaipui mek thu sawiin, "Hetah hian Revenue department-in record an neih zawng zawng dah luh vek a ni ang a, ram neih thuah leh ramri buai vel chinfel nan a ṭangkai hle dawn. Hemi atan hian Serchhip hi pilot project-ah hman a ni," a ti.

Serchhip DC-te nena an inkawm zawhah Seemantinee Sengupta chuan Serchhip District NIC-a thawktute a kâwm leh a ni.



Share this Post

Login to comment
No Comments