Medical college-ah MBBS syllabus thar zir

Kumin aṭanga MBBS zirlaite hman ṭan tur MBBS syllabus thar - Competency Based Medical Education buatsaih chu nimin aṭang khan MIMER (Zoram Medical College)-a teaching faculty-te tan zirhona buatsaih a ni.

 Curriculum Implementation Support Programme hi faculty reading hall-ah MLA Dr ZR Thiamsanga'n a hawng a, vawiin leh naktukah chhunzawm a ni ang.

Dr ZR Thiamsanga chuan, medical college-a thawhhona ṭha leh damlo enkawlna lama thiamna sang zawk neih theihna tur leh medical zirna lama hmasawn zelna tur atana ruahmanna siam a ni chu lawmawm a tih thu a sawi a, "Society-ah medical lam mithiamte chu hmun pawimawh tak chang an nih avangin, he programme pawh hi medical college-a zirlaite'n an chhawr zui theih tur puak chhuahna a nih ka beisei," a ti.

Chief Minister ngaih pawimawh zingah health leh education a tel nia sawiin ZR Thiamsanga chuan, "ZMC tihchangtlun zelna atan state sorkar a inhawng hle. Tun budget-ah cheng vbc. 60 ruahman a ni," a ti a; MIMER-ah mamawh leh ṭul tam tak a la awm tih sorkarin a hriat avangin, tun aṭanga thla rei loteah hmasawnna hmél thar hmuh tur a awm zel tur thu a sawi.

Medical Council of India (MCI) observer Dr Purnima Barua chuan, Mizorama medical college hmasawnna chu Mizoram tan mai ni lo, hmar­chhak pum tan thu lawmawm a nih thu a sawi a, "Hmabak hlen tur tam tak la awm mah se, director leh a thawhpuite'n theihtawp an chhuah hi an fakawm a ni," a ti.

Curriculum thar zirhonaah hian faculty zinga mi Prof. Dr Nagendra Nayak, Dr Manoj Patki, Dr Nirensingh Koch, Dr F Elizabeth Lalhmangaihzuali leh Dr Lalrinfela ten thil pawimawh hrang hrang an sawi ṭhin dawn a ni.



Share this Post

Login to comment
No Comments