Inphêk sual leh mi khawih rawn Veng turin YMA-te ngen an ni

Central YMA chuan, inphêk sual te, veng leh venga anga insual buaite leh mi khawih rawnte a awm loh nan tun hnai khan YMA sub-headquarters, group leh branch hrang hrangte chu an huam chhung ṭheuhah hma la turin a ngen.

YMA sub-head-quarters, group leh branch-te hnenah CYMA chuan tun hnai khan lehkha a thawn a, "Tunlai hian Aizawl khawpui chhung leh Mizoram hmun hrang hrangah inphêk sual/veng leh veng anga insual buai leh inkhawih rawnte leh tlangval ṭhenkhatin a ruala mi pawisawilo sawisak rawnte a lo hluar ta hi CYMA chuan ngaihmawhawm a tiin, ṭha lo a ti hle a ni," a ti a; chutiang thil chu hnam ang pawha thil zahthlak leh, a tuartu tan thil runthlak tak a nih thu a sawi.

Central YMA chuan, inphêk sual, veng leh veng anga insual buai leh inkhawih rawn ang chite véng turin YMA sub-headquarters, group leh branch zawng zawngte chu an huam chhung ṭheuhah hma la turin an ngen a, "YMA member tinin hetiang thâwm hi lo bengvàr a, khawtlang hruaitute pun vat zel turin kan inngen a ni. A theih phei chuan mahni veng chhung ṭheuhah duty-te insiam a, chak taka hma la ṭheuh turin kan inngen tak meuh a ni," an ti.



Share this Post

Login to comment
No Comments