Board chairman minister of state rank a ni dawn

Mizoram sorkarin board hrang hrang a din zinga pakhat, Health & Family Welfare Board vice chairman atana ruat Dr ZR Thiamsanga chuan, Health & Family Welfare Board chu a taka kalpui a nih hunah minister of state (MoS) rank a nih dawn thu a sawi.

Nimina MIMER (Zoram Medical College)-a Curriculum Implementation Support Programme a hmanpuinaah thu sawiin Dr ZR Thiamsanga chuan, "Health & Family Welfare Board hi a taka kalpui a nih chuan vice chairman chu minister of state rank a ni dawn a, "ZMC hmasawn zelna atan ṭangkai ve theih ka beisei. World class education kan siam ang a, Mizoram leh India tan theihtawp i chhuah ang u," a ti.

Mizoram sorkarin kumin kum tirah com-mittee chi hrang hrang a siam thar a, chu'ng committee-ahte chuan chairman atan minister-te leh vice chairman atan MLA-te leh MLA hluite dah a ni. Secretary atan sorkar depart-ment secretary-te ruat a ni thung.

Committee din a nih thu leh hotute ruat chungchangah hian General Administration Department (GAD) chuan February 7, 2019 khan notification a tichhuak a; committee nihphung tur leh an hnathawh dan tur (terms of reference) chungchangah chuan hriattirna la chhuah leh tur a ni.

Chief minister Zoramthanga chuan, hmasawnna hnathawh-naah board system-a kal a nih tur thu a lo sawi tawh a, "Hmasawnna hnathawh dial dial a ni ang. Ngaihtuahtu an tam chuan ngaihtuahna a fing a, board chuan hnathawhte a en zui ang a, chu chuan eiruknate a veng dawn a ni," a ti.

Thu dawn danin, committee hrang hrangte hi board-ah leh (siam) a ni dawn a, tunlai hian member turte an inzawng ṭan mek a ni.



Share this Post

Login to comment
No Comments