MIMER-in first renewal a hmu tawh MCI-in MIMER hming an la thlak lo

Mizorama medical college awm chhun, Mizoram Institute of Medical Education and Research (MIMER) chu Medical Council of India (MCI)-in a hmuna an endik hnuah recognition an hmuh tawh tihnun nawnna hmasa ber (first renewal) chu MCI-in a phalsak tawh a, a kum hnihna atan kalpui zel a phalsak. Mizoram sorkarin MIMER hming  Zoram Medical College (ZMC) tiin thlak mah se, MCI-a a hming erawh chu MIMER tih a la ni zel.

Tarlan tawh ṭhin angin, Mizoram sorkara Council of Ministers meeting chuan MIMER hming hi ZMC tia thlak a lo rel tawh a, chu Cabinet thutlukna ang chuan Health & Family Welfare Secretary pawhin April 26, 2019-ah notification tichhuakin, MIMER hming chu ZMC tia thlak a nih thu a tarlang.

Hetih lai hian, India rama medical college din leh kal dana thuneitu MCI website-ah erawh chuan Mizorama medical college awm chhun hi MIMER tih a la ni reng thung.

India ramah MCI pawmpuina tel loin medical college din theih a nih loh thu leh, MCI lama an hming chu MIMER tih a la nih avangin Mizorama medical college chu MIMER tia sawi theih a la nih reng thu, MIMER lama hotute chuan an sawi.

MIMER hotute hnen aṭanga thu dawn danin, MCI chuan MIMER din tur hian May 25, 2018-ah Letter of Permission (LoP) pe tawh mah se, kum nga chhung (kum 2023) thleng chu permit tinung (renewal of permit) turin kum tin MCI-in a thara permit a pek a ngai a; kum 2023 thlenga kum tin MCI-in permit a renew theih chuan, kum 2023 hnu lam aṭang chuan permanent recognition a hmu thei tawh dawn a ni.

Academic session thar, kum 2019-20 atan pawh MCI-in MIMER hnenah renewal of permission a pek tawh thu sawiin MIMER hotute chuan, MCI-in a kum hnihna atana permit a pe leh ta chu lawmawm an tih thu an sawi a, "Kum 2019-20 ah pawh zirlai thar (first year zir tur) 100 lak a ni leh dawn a, second year-ah chuan first year paltlangte zawng an lut chho ang," an ti.

MIMER-ah hian first year-ah chuan subject pathum - Anatomy, Physiology leh Biochemistry-te a awm a; second year-ah subject panga - Pathology, Microbiology, Pharmacology, Forensic Medicine & Toxicology leh Community Medicine-te a awm dawn a ni.



Share this Post

Login to comment
No Comments