Assam sorkarin Mizoram chhungah Kawngpui a siam lo - Vairengte SDO(C)

Assam leh Mizoram inrina bul hnai, Mizoram chhung chinah Assam sorkarin kawngpui a siam nia sawi chu thu dik tâwk lo a ni a, kawng an siamna lai chu Mizoram chhung a nih loh Vairengte SDO (C) -in a sawi.

Phainuam leh Saihapui-V velah Assam sorkarin kawngpui a thawm ṭhat thu social media-ah tarlan a ni. Hemi chungchangah hian Saihapui-V khawtlang hruaitute chuan, Assam sorkarin Saihapui-V leh Phainuam inrina lei thleng kawng an siam tih an sawi a; Saihapui-V leh Phainuam inkara Assam sorkarin kawng siamna lai chu Assam ram chin nia ngaih a nih thu te, kawng siamtu contractor-te nen an inbiakpawh reng thute leh, kawng chu dan pangngai anga siam an nih thu an sawi a ni.

Kawng siam chungchangah hian Vairengte SDO (Civil) Isaac Lalrempuia chuan zawhna chhangin, Assam-in kawngpui an siam nia sawi Saihapui-V leh Phainuam inrinna lei thleng chu tun hma aṭangin Assam state chan a nih thu leh, Assam sorkarin nikum aṭang khan an siamṭha ṭan a, kuminah pawh an siam chhunzawm zel thu a sawi.

Isaac Lalrempuia sawi danin, Saihapui-V leh Phainuam inrinnaah tun hma deuhin Mizoram sorkarin lei a dawh a; chumi bul lawkah chuan Assam sorkarin Mizoram lei dawh aia lian zawk lei dang a rawn dawh ve bawk. Assam lei dawhna lai chu Assam ram chhung nia ngaih a nih avangin Mizoram sorkarin a ngai haw lem lo a, Assam sorkarin a enkawl chhunzawm a ni. Lei lei piah lam chu Mizoram sorkarin a enkawl ve thung.

Isaac Lalrempuia chuan, Mizoram chhungah Assam sorkarin hma la ni se chuan report an dawn nghal tur thu a sawi a; tun thleng chuan Assam sorkarin  Mizoram chhung chinah kutthlak a neih thu Mizoram sorkarin report a la dawn loh thu a sawi bawk.



Share this Post

Login to comment
No Comments