Tlabung RD Block thar hawn a ni

Rural Development (RD) minister Lalruatkima chuan nimin khan Tlabung RD Block thar a hawng a, BDO pisa thar sakna tur lungphûm a phúm nghal. Tlabung RD Block hi Mizorama RD block 28-na a ni.

Lalruatkima chuan, Kawrte-thawveng leh Tlabung khuate'n RD block thar an nei chu hmasawnna a nih thu a sawi a, "RD block thar neih hi thil awlái lo leh harsa taka sual chhuah a ni a, Mizoramah hmasawnna rualkhai a awm theih nan sorkar chuan thuneihna sem zâi leh kan ban phâka sorkar chhawp chhuah zel a tum a ni," a ti.

Tlabung RD Block-in department hrang hrang hma-laknate a keng tel dawn tih sawiin Minister chuan, "Hmalaknate tihlawhtling turin block mipuite'n kan thawhpui thiam a ṭul dawn a, mipuite'n ṭha taka sorkar an thawhpuia an lo finchhuah ṭhin a pawimawh," a ti a; Tlabung RD Block-in a chhunga chêng mipui tan hmasawnna a thlen ngei a beisei thu a sawi.

Khualzahawm Lawmawma Tochhawng, MLA pawhin thu sawiin, Tlabung leh a chhehvel khuate tana hmasawnna hrang hrang kalpui mekte chu chhawr ṭangkai a, hmasawnna tlo leh daih rei nei thei tura hma la turin mipui a chah.

RD Block hawnnaah hian bialtu MLA (West Tuipui) Nihar Kanti Chakma, RD secretary Dr Lalzirmawia Chhangte, Lunglei bawrhsap Ramdinliani, RD deputy secretary Zoremthara Ralte te bakah, BSF hotute leh khawtlang hruaitute an tel.

Tlabung RD Block din hi March 25, 2022-a Council of Ministers ṭhukhawm chuan an pawm a, May 20, 2022 khan Lungsen RD Block leh Bunghmun RD Block aṭangin Tlabung RD Block din a ni a, khua 37 (village 17 leh sub-village 10) a awm.

Tlabung SDO (Civil) hmasa ber chu H Zonunmawia a ni a, ani bakah hian MGNREGA aṭangin thawktu mi 16 an awm a ni.