Home Minister-in Mizoram sorkarin VIP light chhit a titawp theiah ngai

Home minister R Lalzirliana, Traffic Management Committee Coordination Committee chairman ni bawk chuan, sorkar mi pawimawhte'n an official car-a VIP light an chhit ṭhin chu state dangte'n an tihtawp chuan Mizoram sorkar pawhin a titawp ve thei tho dawn tih a sawi.

Sorkar laipuiin May 1, 2017 aṭanga VIP car-a VIP light chhit tihtawp a tum leh state ṭhenkhatin VIP light hman tawh loh an tum chungchanga zawhna chhangin R Lalzirliana chuan, Mizoram sorkar pawhin a titawp thei tura a ngaih thu a sawi a; chutih rualin, hei hi a mimal ngaihdan a la ni rih tih a sawi a ni.

Prime minister Narendra Modi hoa April 19-a Union Council of Ministers ṭhukhawm chuan Union minister for Road Transport & Highways Nitin Gatkari rawtna angin, sorkara mi pawimawhte'n an motor-a VIP light an chhit ṭhin chu May 1 aṭanga tihtawp an rél a ni.

Sorkar laipuiin hetianga thutlukna a siam hma hian Goa chief minister Manohar Parikar, Punjab chief minister Capt. Amarender Singh, Gujarat chief minister Vijay Rupani, Rajasthan chief minister Vasundhara Raje leh Uttar Pradesh chief minister Yogi Adityanath-te chuan an state-ah ṭheuh VIP light chhit chu mi dangte harsatna thlentu nia an ngaih avangin tihtawp an tum thu an lo puang tawh a ni.



Share this Post

Login to comment
No Comments