MZP-in Mamit damdawi-inah Doctor paruk dah belh an phût

Mizo Zirlai Pawl (MZP) headquarters, Mamit chuan thuchhuah siamin, April 30, 2017 ral hma ngeiin Mamit District Hospital-ah doctor paruk dah belh turin sorkar an phût tih an tarlang.

Mamit District Hospital-ah doctor panga an awm mek a, an indaih lo hle nia sawiin Mamit MZP chuan, "Inkalpawhna kawng kan neih ṭhat loh vangin, damlo harsatna tâwkte'n Aizawl leh hmunpui zawk pan an harsat ṭhin. Thawktute inpekna nasain fakawm ṭhin mah se, thawktu an tlem avangin mipuiin harsatna an tâwk fo a ni," an ti.

Mamit MZP-in doctor paruk dah belh an phûtte chu - medicine, general surgeon, ophthalmologist, ENT surgeon, pathologist leh anaesthetist pakhat ṭheuh a ni.

Mamit MZP chuan, Mamit damdawi-ina doctor ṭhenkhat leh nursing superintendent chu hmun dangah sawn tumna a awm nia sawiin, thlaktu awm lo chuan hmun dang­a sawn lo turin sor­kar an ngen a ni.



Share this Post

Login to comment
No Comments