Mizo zirlaite'n hnam lam an thiam theih nan MZP-in hmalak an rel

Mizo Zirlai Pawl (MZP) chuan nimin khan Champhai Venglai YMA Hall-ah an rorelna sang ber dawttu, Federal Souncil Sitting vawi 47-na an nei a; Mizo zirlaite'n hnam lâm chi hrang hrang an thiam lehzualna tura hmalak an rel.

MZP chuan, hnam nun leh ziaráng inzirtirna lam hawi ram puma zirlaite tan uar lehzuala kalpui a nih theih nan hmalak chhunzawm an rél a; October 27-a Zirlaite Ni-ah zirlaite'n faina pawimawhzia an hriat tharna turin ram pum huapa inzirtirna neih an rel bakah, Mizoram sorkar enkawl college hrang hrangah skill development programme zir tel a nih theih nan sorkara thlen an rel a ni.

Sorkar khawih thil an rel zingah, Mizoramah labour court din a nih theih nana hmalak te, sorkara file a kal chak theihna tura hmalak te, Mizoram hmun kilkhawr thlenga doctor-te'n hna an thawh theihna tura hmalak te, Mizoram sorkar hnuaia hna lakah Mizo ṭawng middle school standard ngai ṭhin chu criteria mumal tak a awm theih nana hmalakte a tel.

Mizorama private company hrang hranga hna thawktute chhui chian a, ram leilung fa thawktu a tam thei ang ber an awm/luh theih nana hmalak leh, Mizorama hnam dang dan loa awmte dapchhuah chhunzawm leh dan loa an lo luh tawh lohna tura hmalakte an rel bawk.

MZP Federal Council Sitting hi vice president B Vanlaltána'n a kaihruai a, president Lalsangzuala Ngente-in thu sawiin, general secretary L Ramdinliana Renthlei-in report a pe.



Share this Post

Login to comment
No Comments