Mipuiin Congress paih an nghakhlel - Zorama

MNF president Zoramthanga chuan, Mizo ṭhalaite zu vanga an thih tam tawh avangin mipuiin Congress sorkar paihthlak an nghakhlel niin a sawi.

Zoramthanga hian nimin khan Lungphun/Hreichuk community hall-a MNF Dampa East Block Conference a hmanpuinaah thu sawi­­in, "Kohhran ràwn ngai ti loin zu an zuar a, zu zawrh chu kohhran ṭawngṭai Pathian chhanna tiin an la elsên zui a. Pastor leh kohhran mi zu zawrh sawiseltute an chhinchhiahtir a, sorkar hnathawk zu zawrh sawi­seltute hmun hlaah an sawn a, zu quality chhia tia sawiseltute jail-ah an khung a ni," a ti.

MNF President chuan, kum hnih chhungin zu vangin police 340 an thi a, Mizo mipui 4,000 aia tlem lo an thi niin a sawi a; ṭhalaite zu vanga an thih tam tawh avangin mipui­in Congress sorkar paih thlak hun nghakhlel takin an thlir mek niin a sawi.

Zoramthanga chuan, Congress party-in kum 50 chuang India rama ro an rel chhungin mipuite retheiah an siam niin a sawi a, "India mipuiin an ning tawh em em a, in­thlan a piangah an tla zawih zawih a ni. Tunah chuan state pangaah chauh an sorkar tawh," a ti.

MNF President chuan, Pathian leh mipui zar­ah MNF an sorkar leh dawn nia sawiin, "NLUP anga theibawng sem loin SEDP hmangin chhung tinah eizawnna ngêl­nghet neih theih nan Rs. 3,00,000 aia tlem lo, society kaltlangin hmun danga pawhpên theih loh­in kan pe dawn. SEDP-ah hian sumah buaina a awm lo ang," a ti.

MNF thuchhuah chuan, nimina Lung­phun khuaa inkhawmah hian Congress leh party dang aṭangin MNF-ah mi 118 chu Zoramthanga'n a lawm lut niin a tarlang a; nimin vek khan Khawzawl Zaingen YMA Hall-ah MNF Tui­chang North Block Conference-ah khaw hrang hrang aṭangin voter 166 MNF-ah lawm luh a ni tih a tarlang bawk.



Share this Post

Login to comment
No Comments