Lalsawta'n MISA Conference a hmanpui

Mizoram Information Service Association (MISA) chuan nimin khan IPR Conference Hall-ah Annual Conference an hmang a, Finance minister Lalsawta leh IPR secretary Biaktluanga ten an hmanpui.

Lalsawta chuan, IPR chu department pawimawh, sorkar hmalakna leh ruahmanna hrang hrang mipuite hnena puangzar a nih tuh sawiin, "Sorkar a awm chhunga department awm reng tur, thu rintlak leh belhchian dâwl tichhuaktu an ni," a ti.

Finance Minister chuan, MIS officer-te chu a êng zawnga thil thlir ṭhin tur leh department danga officer-te nen ṭha taka thawkho zel turin a fuih a, "New Economic Development Policy hmalaknaah IPR department-in mawhphurhna pawimawh tak a nei chho zel dawn a ni," tiin, NEDP hlawhtlin theih nan thawhpuiah a sáwm.

IPR secretary Biaktluanga chuan, MIS officer-te chu sorkar thupuangtu an nih angin mawhphurhna sang tak an nei tih a sawi a, "Sorkar leh mipui inkara inlaichinna ṭha siam theitu an ni," a ti. IPR director Lalnithangi pawhin, an department chu lian lo mah se, Mizoram kil tin aṭangin print leh electronic media kaltlangin sorkar hmalakna pawimawh chak taka puangzar rengtu a nih thu a sawi bawk.

MISA Conference hi an vice president David L Thangliana’n a kaihruai a, general secretary PB Lianthangpuii'n IPR department hmalakna leh hmachhawpte a sawi. Chawhnu lamah 'Public relations profession’ tih thupui an zirho a; C Lalrosanga'n ‘Role of government public relations practitioners’ tih thupui sawiin, Zothankunga, MIS (Retd)-in ‘Sorkar press release ziah dan’ tih a sawi thung.



Share this Post

Login to comment
No Comments