Hunthar Veng, Aizawlah nikum lama lei tawlh chu tun hnaiah a chêt leh avangin April 19, 2017 khan Lalrozuala in, Assam type leh semi-pucca building aṭangin chhungkaw pali ve ve, an vaiin chhungkaw pariat an inthiar chhuak a; nimin khan CS Lalrinzuala in, Assam type aṭangin chhungkaw thum an inthiar chhuak ve leh.

Lei che vang hian Lalrinawmi in, RCC building chu a chanve vel a chim titih tawh a, in chu ṭhiah nghal turin thuneitute'n an buaipui mek. In hi nikum khan a neitute'n an rauhsan tawh a ni. Lalrinawmi in chhaka B Sairengpuii in hungna pawh a khi tawh.

Lei chetna hmun hi nimin tlai khan bial­tu MLA, minister Lal Than­zar hoin a kaih­hnawih department hotu­te'n an en a, Disas­ter Management & Rehabilita­tion consultant PC Lawmsanga, director C Lalpeksanga, Aizawl DC pisaa hotute'n an ṭawiawm.

Lalrinawmi in chu PWD-a Hazard Safety Cell-in ṭhiah ngam a nih leh nih loh enfiah phawt se, ṭhiah theih a nih chuan a rang lama ṭhiah ni se, an ti. Vaivakawn-Hunthar kawngpui pawh motor lian a kalin a nghawr nasat avangin nimin tlai aṭang khan motor lian kal khap nghal a ni. 

Share this Post