Bru helin an rûkbo mi pahnih chhuah

April 16, 2017 zing dar 3 vel khan Vaseitlang-II khua, Lawngtlai district-ah hel nia rin mi 10 vel ralthuam keng an lut a, mi pahnih - V/C member Mohan Joy (35) leh Otichondro te an hruai bo. Mi an hruai bote hi a tûk, April 17-ah an chhuah leh a ni. 

He thil thleng chung­chang hi Home minister R Lalzirliana chuan nimin khan a pisaah a sawi a; hel nia rinte'n an rûkbo zinga pakhat, Otichondro chu April 16-ah vek Nghalimlui leh Phaibawk inkarah an chhuah a, Mohan Joy chu April 17-ah Chhottaguisury, Parva khaw kawng lamah an chhuah leh tih a sawi. An pahnih hian April 18 khan Vaseitlang-II an thleng a ni. 

Mi rûkbo an awm tih hriat a nih ve leh police-te'n Vaseitlang an pan nghal a, April 19 chhun dar 11 khan Vaseitlang-II ah Bru Democratic Front of Mizoram (BDFM) mi pathum - Zodarai, Zoihamrai leh Vanlallawma, Vaseitlang-II te chu an man a, an kut aṭangin AK-47 rifle pahnih leh a mû 39 an man tel. 

Home Minister chuan, Mizoram police-te chuan kumin tir lam khan BDFM hel president Romawia leh secretary Kauchang te chu inpe turin Tripura lam an pan tih hriat a nih thu a sawi.

R Lalzirliana chuan, BDFM camp-ah hel ṭhen­khat inkarah buaina a thleng a, January 11, 2017 khan BDFM panga chuan an hotu pahnih an that niin a sawi a; chumi hnuah hel panga chuan silai nen Mizoram lamah luh an tum tih hriat a nih avangin police-te'n an ngaihven reng thu a sawi bawk. 



Share this Post

Login to comment
No Comments