Champhaiah pisa leh zirna-in dang DC Complex-a motor 5 hâl a ni

Champhai District Hospital-a doctor leh thawktu dang dah belh phûtin MZP headquarters, Champhai chuan nimin khan Champhaia sorkar pisa leh zirna-in zawng zawng an khâr. Nimin chawhnu khan Keifangtlanga Champhai DC Complex-ah buaina a chhuak a, MZP duty nia hriatte'n DC Complex garage-a motor panga an hâl. 

Champhai aṭanga thu dawn danin, Champhai MZP-te chu an khuaa sorkar pisa leh zirna-in zawng zawng khâr tur hian zing aṭangin sorkar pisa leh zirna-inahte an duty a, duty turin Champhai College leh higher secondary school zirlaite an thawk chhuak.

Champhai DC pisa aṭanga thu dawn danin, MZP duty-te hian nimin chawhnu lam khan lungin Champhai DC pisa an vawm a, pisa darthlalang eng emaw zat a chhia. Lung hmanga pisa an vawm vanga police-te nen an innawr laiin, DC Complex-a garage-a motor-te chu a kâng tih hmuh a ni a; MZP duty-te hal nia an hriat thu, DC pisaa thawkte chuan an sawi.

Garrage leh motor pangate a kâng chhe hneh hle. Motor kângte hi Gypsy pahnih, Bolero car pakhat, Santro car pakhat leh bike pakhat a ni a; sorkar motor pali leh private motor pakhat a ni. DC pisa bus pakhat darthlalang a chhe nual bawk. 

Buaina chhuah hnuah buaina chhuahna hmun pana kal police-te leh zirlaite chu DC Complex thlen hma, Chehrep kâwnah an innawr a, zirlai 18 an hliam nia sawi a ni a, Champhai damdawi-inah hruai an ni. 

Police-te sawi danin, zirlaite'n sikul leh sorkar pisa an dannaah hian hmun hrang hrangah police an duty a, DC pisaa duty-te chu zirlai ṭhahnem takin an chîm avangin anmahni pui tura police dang tirhte'n DC Complex an thlen hmain zirlaite chuan tam hnehin DC Complex chu an luhchilh a ni.

He thu ziah lai thleng hian MZP duty-te chu Champhai DC Complex bulah an la awm khawm a, nimin tlai dar 6 thlenga sorkar aṭanga thu lawmawm an hmuh loh chuan sorkar pisa leh zirna-in an kharte chu chhunzawm an tum a, nizanah pawh DC Complex bul Chehrep kâwnah riah an tum a ni.

Champhai MZP-in February 25, 2017-a press release an siama an tarlan danin, doctor mamawh zual dah an phûtte chu - surgeon pakhat, naupang specialist pakhat, medical officer pahnih, pharmacist pakhat leh District Jail-a awm tur doctor pakhatte a ni. 

Champhai District Hospital-a doctor dah belh tura sorkar kar nan hian Champhai MZP-te chuan April 18 leh 19 khan Champhai khawpui huam chhungah total bandh an huaihawt tawh a; an thil phût tihhlawhtlin a la nih loh avangin nimin aṭang khan tiam chin awm loin sorkar pisa leh zirna-inte an dang ṭan leh a ni.

Health department hotute hnen aṭanga thu dawn danin, Champhai District Hospital-ah hian tun dinhmunah doctor 11 an awm mek a, kum 2011 chhiarpuia Champhai district-a mihring awm zat 1,25,370 aṭanga chhûtin doctor pakhatin mi 11,397.3 zel enkawl ang an ni. 



Share this Post

Login to comment
No Comments