SSA zirtirtute'n dah ngheh phut

Mizoram SSA Teacher Association (MSSTA) chuan March 17 khan Chanmari YMA Hall-ah khawmpui an hmang a, SSA addl. SPD V Lalsiam­thara'n a hman pui. MSSTA chuan Education dept. hnuaiah dah ngheh an phut.

Conference hi an MSSTA president R Lalrinpuia'n kaihruaiin V Lalsiamthara chuan, "Kan hnathawhna ṭheuhah theihtawp chhuah ṭheuh a pawimawh. Pawl anga hmalakna a chak zawk theih nan, hotute duhsak tlaka hnathawh a ngai. Mizoram zirna hi SSA zirtirtute tel lo chuan a kal a kim thei tawh lo a, chu chu hre renga Mizoram zirna in hma a sawn theih nan theihtawp chhuah ang che u," a ti.

Khawmpuiah hian an member thite sunna hun a nih bakah, rorel inkhawm leh hruaitu thar thlanna hun an hmang a, resolution pahnih an pass bawk. 

An resolution pass-te chu SSA Upgraded Teacher te hi RTE-SSA Norms angin society hnuaia, SSA teacher aṭangin Education dept. hnuaiah regular post min siam sak rawh se tih leh  SSA leh state sorkar sum hmanga sikul thar din primary school -98 leh upper primary school - 401 te hi official-in sorkar sikulah chhiar ni tawh rawh se tih a ni.



Share this Post

Login to comment
No Comments