Champhai MJA-te'n kawng siam an enfiah

MJA, Champhai district member-te chuan March 17, 2017 khan World Bank aṭanga sum hmuh hmanga Champhai leh Zokhawthar inkar kawng zauh hna thawh mek an tlawh a; Khankawn aṭanga Zokhawthar inkar leh Zotlang aṭanga New Champhai inkara hna thawh dante an enfiah.

Champhai MJA-te hian Tarmat, Sheladia leh PWD hotute chu base camp-ah kâwmin, kawngpui siam kawnga harsatna an tawhte an sawipui a; hna thawktute chuan, a leilungin a zir loh vanga hmun ṭhenkhata leimin te, a tira CTS anga siam tum, a theih dawn loh vanga GSB-a thlakte chu an harsatna neihte a nih thu an sawi.

MJA-te chuan, Champhai-Zokhawthar kawng chu Champhai district tana pawimawh a nih avangin, uluk taka thawk turin an chah a; fûr lai pawhin châwl loa a thawh theih chin thawk chhunzawm zel tur leh, an hna tiṭhuan­awp thei harsatna an neih chuan hmalakpui an inpeih reng thu an hrilh bawk.

Champhai MJA-te tarlan danin, tun dinhmunah kawngpui siam chinah, a inthuah tur pali zinga a hnuai ber, compacted subgrade thawh a ni a, kawngpui hi feet khat leh a chanve vela chhah tur a ni. Kawngpui zauh leh kawng thar sial hna chu tuna an thawh tam zawk a ni rih a, kawng zauh hna bik 80% zawh tawh a ni.

Champhai-Zokhawthar kawngpui hi December 26, 2014-ah thawh ṭan a ni a, October 2018-a zawh tura ruahman a ni. Hna thawktu contractor chu Tarmat Ltd. an ni a; a pumpuiah hna thawh tur zinga 42% thawh zawh tawh niin, sum ruahman cheng vbc. 137.14 aṭangin 37% hman a ni tawh.

Kawngpui siam vanga zangna­dawmna leh ṭanpuina atana sum pek chhuah zat chu cheng nuai 2465.99 a ni a, vantlang mamawh siamna atan cheng nuai 55.35 hman a ni tawh bawk. Kawngpui hrûlah vantlang êk-in pahnih, zun-in panga, bus shed panga leh bazar panga siam tel tura ruahman a ni.

Kawng siamtu Tarmat-te hian khaw­tlang tana hna thawhna turah ruahmanna la nei lo mah se, mimal ngenna avangin 7th.Day tlanga MedAim Hospital panna kawng an laihsak tawh a; kawngpui zauhna atan Bethel Veng V/C-te chu JCB an hmantir tawh bawk.



Share this Post

Login to comment
No Comments