Aizawl Tennis Court chei thar hawn a ni

Aizawl Tennis Court chei thar, semi indoor stadium chu Inrinni chawhnu khan Sports & Youth Services minister Zodintluanga'n a hawng.

Zodintluanga chuan, fûr leh ṭhál, chhun leh zana inkhelh theihna tura Aizawl Tennis Court siam a ni chu lawmawm a tih thu sawiin, tennis khel ṭhin ṭhalaite chu an vanneihzia hria a, intihhlimna atan chauh ni lo, khawvela Mizote hming tiṭhatu an nih theih nan court chu hmang ṭangkai turin a chah a; "Salem Vengah tennis court dang pahnih siam theihna tur leh Rajiv Gandhi Stadium sirah court pathum vel len theihna tur hmun en mek a ni," a ti.

Sports Minister chuan, Mizoram sorkarin hun rei lo te chhungin hmasawnna hna ṭhahnem tak a thawk tih a sawi a; kawlphetha, hriselna lam leh kawngpui siam kawngah sorkarin nasa takin hna a thawk tih sawiin, "Thingtlang leh khawpuiah hmasawnna ruhrel ding thar hmuh tur tam tak a awm a, infiamna lamah phei chuan hmasawnna a tam lehzual a ni," a ti. Mizoram hmun hrang hranga infiamna hmunhma siam tawh leh siam mekte a sawi lang bawk.

Aizawl Tennis Court hawnnaah hian parliamentary secretary (SYS) Hmingdailova Khiangte, Mizoram Tennis Association president CL Thangliana leh Aizawl Tennis Club president Lalbiakzama te pawhin thu an sawi.

Mizoram State Sports Council (MSSC) secretary C Laltlanthanga'n technical report a pek danin, Aizawl Tennis Court semi indoor stadium sakna atan Special Plan Assistance aṭangin cheng nuai 100.80 hmuh a ni a, May 2015-ah siam ṭan niin, October 12, 2016-ah zawh a ni.

Stadium hi a dung metre 37 leh a vâng metre 18.70 niin, a zau zawng chu square metre 691.9 a ni a; a chung atan dyna roof hman niin, a chhuat atan rubberised synthetic fibre hman a ni a, zana inkhelh theih turin lighting system ṭha tak vuah a ni bawk.

Tennis Court hawn zawh hian Sports Minister leh Mizoram U-14 champion JH Hruaizela te ṭang dun leh ATC president Lalbiakzama leh Mizoram no.1 hlui SL Sailova te ṭang dunte'n exhibition match an khel nghal a ni.



Share this Post

Login to comment
No Comments