Adventist ṭhalaite'n Global Youth Day hmang

Adventist ṭhalaite chuan nimin khan khawvel pumah Global Youth Day an hmang a, Mizorama Advetist  ṭhalaite pawhin uar takin an hmang.

Global Youth Day-ah hian biak-inah inkhawm loin, mi dangte ṭanpui leh anmahni ngei 'sermon' ni turin biak-in páwn lamah rawngbawl hna an thawh ṭhin a, thupui chu 'Be the sermon' tih a ni. Inrinni khan varṭianah an kohhran tina ṭhalaite'n an bul hnaia damdawi-in, hnuchham châwmna leh mi chanhai zawkte enkawlna hmunah pawisa, ei tur leh silhfente an pe a ni.

A hmanna pui ber, Millennium Centre kawt­ah Mizo Conference Youth Department leh Youth Federation pathum ṭangkawpin progra­mme an hmang a; Mizo Conference Youth Depart­ment-a director Chawng­siampuia'n thuchah a sawi. 

Global Youth Day pual hian Aizawl East, Aizawl West leh KLS huam chhunga ṭhalaite'n Aizawl Civil Hospital-ah thisen pek rûnpui an huaihawt a; mipa 102 leh hmeichhia 19-te'n thisen unit 121 an pe. Champhai District Hospital-ah thisen unit 34 leh Siaha District Hospital-ah unit 31 an pe bawk. 



Share this Post

Login to comment
No Comments