NEDP duh chen chen a kalpui theih NEDP atan Central atangin sum hmu lo

Planning minister Lalsawta chuan MNF member Lalruatkima zawhna ziaka chhangin, New Economic Development Programme (NEDP) chu Mizoram sorkarin a duh chen chen a kalpui theih thu a tarlang a, "Sorkar laipui aṭangin a hranpaa sum hmuh leh dil a ni lo," a ti. 

Planning Minister chuan, NEDP chu hunbi tiam nei scheme/project a nih loh thu sawiin, "Sorkar policy a nih angin sorkarin a duh chen chen a kalpui theih a ni a, policy thlak a nih hma chuan kalpui zel tur a ni," a ti a; NEDP chu NLUP-in a hrin chhuah anga sawi theih a nih thu a sawi.

NLUP-a hlawhtling, buh leh bâl, thlai thar chhuah leh ran vulh pungte chu market economy siamsak an ngaih thu sawiin Lalsawta chuan, "Beneficiary-te hnenah ṭanpuina sum pek aiin, thlai/ran vulh a pun theih nan an lo pun hnua chu'ng mite'n an mamawh inṭawm kawng, kudam/cold storage-te buatsaihsakin, sorkar hian facilitator hna thawh a tum a ni," a ti.

Lalsawta chuan, NEDP chu Mizoram sorkar policy duan a nih thu tarlangin, "NEDP atan hian sorkar laipui aṭangin a hranpaa sum dil leh hmuh a ni lo," a ti a; sorkar laipui aṭanga state sorkarin a chanpual 14th. Finance Commission devolution sum pangngai hmuhte aṭangin awmze nei zawka hmalakna turin state sorkarin sum a ruahman tih a sawi.

Planning Minister sawi danin, NEDP hi comprehensive growth strategy a ni a, line department hran ruat a ni lo. Ram hmasawnna atana thawk tur mamawh dan azirin sorkar department zawng zawngte'n a ṭul ang zelin leh NEDP Core Committee remruat ang zelin hna an thawk a ni.

Education, Health, PWD, Power & Electricity leh department tam tak hnathawh a ṭul ang leh sâwt ngei turin a hun leh hmunah NEDP chu luhchilh theih a ni.

NEDP ṭha taka implement a nih theihna atan Three Tier Committee din a ni tawh a, chungte chu - NEDP Core Committee, NEDP Executive Committee leh NEDP Monitoring and Evaluation Committee din a ni. 

Kum 2016-2017 atan Sectoral Allocation NEDP compo­nent atan cheng vbc. 277 ruahman a ni a, sectoral allocation aṭang hian DPRs/Policy Agenda pawm fel deuh vek a ni tawh. 

NEDP atan hian heads of department-te leh procurement khawihtute nen workshop vawi thum neih a ni tawh a, procurement manual leh standards bidding document siam nise tih a ni ang, UNDP procurement expert-te'n draft handbook on procurement an buatsaih tawh a, department-te aṭangin comment lak mek a ni.

NEDP atan hian sorkar kum kal mekah cheng vbc. 270 dah a ni a, kum 2017-18 ah chuan sum dah zat tipungin, cheng vbc. 750 ruahman a ni.



Share this Post

Login to comment
No Comments