Mizoram mipuite hamṭhatna atan Mawhphurhna tam tak ka nei: Larsap

Governor Dr Aziz Qureshi chuan Mizoram Governor nih chu hlimawm a tih thu a sawi a, "Mi ṭhenkhat rin dan ang lo takin Mizoram Governor nih hi nuam ka ti. Mizoram mipui hamṭhat nana thawk turin mawhphurhna nasa tak ka chungah a innghat a ni," a ti.www.vanglaini.org

Dr Aziz Qureshi hian Thawhṭanni khan Kolasib Circuit House-ah Kolasib district-a sorkar officer leh NGO hruaitute a kâwm a; a theihna zâwnah Mizoram tan harsatna paltlang tura theihtawp a chhuah zel nia sawiin, Mizoram mipuite'n hmasawnna duhawm tak a neih hun hmuh ve theih a châk thu a sawi.

Governor-te'n mipui zah an kai tih sawiin Dr Aziz Qureshi chuan, "Mipui náwlpuite'n an harsatnate an va thlen theih nana Governor-te hmuh an harsa ṭhin hi ṭha ka ti lo. Mi lian leh tê ber thlengin mamawhna an nei a nih phawt chuan secretary-te kaltlangin hmuh theih reng kan ni," a ti. www.vanglaini.org

Sorkar official leh tlawmngai pawlte'n Bru lak kîr lehna tura harsatna awm an hrilh chungchangah Dr Aziz Qureshi chuan, a theihna zâwna ṭak lo lak ve a tum thu a sawi.www.vanglaini.org

Larsap chuan, sorkar leh NGO hruaitute chu mi narân tan sorkarin eng chin nge hamṭhatna a pek a zâwt a, "District chhunga sorkar hmalakna reng chu mi narân leh khawsak harsa zawkte huapzo a ni tur a ni," a ti.

Sorkar official-te sawi danin, Kolasib khua hi district-a puan a nih hnuah Governor-in an tlawh vawi khatna a ni a; Thawhṭanni vek khan Serlui-B Hydel Project a tlawh a, P&E hotute'n sorkar hmalakna leh hmachhawp hrang hrangte an hrilhfiah a ni.


Share this Post

Login to comment
No Comments