NREGA-ah nuai 9,941.23 hmu tawh Inhlawhna siam tawh belhkhawm - ni 164

Sorkar kum kal mek, April 2014 aṭanga February 2015 thleng khan ni 100 inhlawhna tia hriat lar, MGNREGA hnuaiah Mizoramin cheng nuai 9,941.23 a hmuh tawh a, hmarchhak state zinga sum dawng tlem ber dawttu a ni. Mizoram district tina inhlawhna siam tawh zat belhkhawm chu ni 164 a ni a; Aizawl district-in ni 25 inhlawhna siam tawhin, inhlawhna siam tam ber district a ni.

Kum kal mekah hmarchhak state zingah Arunachal Pradesh-in cheng nuai 2704.16 hmu tawhin, a hmu tlem ber a ni a; chutih rualin, Arunachal-ah hian job card nei mi 10,004 chiah an awm. Arunachal-a job card nei zat hi Mizorama job card nei zat 1,80,300 aṭanga tehin, 5.55% chauh an ni a; an pawisa hmuh erawh chu Mizoram sum hmuh tawh nuai 9,941.23 aṭangin 27.20% a ni thung.

Thu dawnnain a sawi danin, hmarchhak state zinga Mizoram aia job card nei tlemna state-te leh job card awm zat chu - Arunachal Pradesh-ah 10,004, Manipur-ah 30,685, Meghalaya-ah 57,547 leh Nagaland-ah 10,903 a ni a; Assam-ah 1,33,693 leh Tripura-ah 2,76,010 an awm. Mizoramah chuan job card nei mi 1,80,300 an awm a ni.

Hmarchhak state pasarih - Mizoram, Arunachal Pradesh, Assam, Manipur, Meghalaya, Nagaland leh Tripura-te hian April 2014 aṭanga february 2015 thlengin MGNREGA-ah cheng nuai 1,86,330.93 an dawng tawh.

Job card nei tamna state-in sum an dawng tam bik lo a, job card nei tlemin an dawng tlem chuang lo. Job card azira pawisa dawn a tam loh chhan hi state tinin ni 100 inhlawhna an kalpui dan ṭhat leh ṭhat loh aṭanga teh a nih vang niin thu dawnna chuan a sawi a; "MGNREGA kaihhruaina zawm ṭhat leh zawm ṭhat tawk lohin pawisa dawnah awmzia a nei hle," an ti.

Sorkar laipui chuan tun hnai khan Mizoram tan MGNREGA hnuaia cheng vbc. 32 a rawn pe leh a, chu chu February 2015 khan district hrang hrangah sorkarin a pe chhuak tawha thu dawn a ni.

Kum 2014-15 ah thla hnuhnung ber a kal mek a, chutih laiin, February 2015 thleng khan inhlawhna siam tam ber Aizawl district-in ni 25 chiah inhlawhna a la siam. Inhlawhna siam tlem ber Saiha district-ah chuan ni 17 chiah inhlawhna an la siam a ni.

NE-te MGNREGA sum hmuh
(April 2014 - February 2015)

State Pawisa hmuh Job Card
Arunachal Nuai 2,704.16 10,004
Assam Nuai 50,023.46 1,33,693
Manipur Nuai 20,908.43 30,685
Meghalaya Nuai 27,785.90 57,547
Mizoram Nuai 9,941.23 1,80,300
Nagaland Nuai 11,305.27 10,903
Tripura Nuai 63,662.48 2,76,010
Total Nuai 1,86,330.93 6,99,142

MGNREGA inhlawhna siam zat
(April 2014 - February 2015)

District Job Card Inhlawh siam zat Sum hman
Aizawl 25,995 Ni 25 Nuai 1,707.27
Champhai 28,364 Ni 22 Nuai 1,635.66
Kolasib 17,405 Ni 20 Nuai 935.46
Lawngtlai 27,261 Ni 19 Nuai 1,372.01
Lunglei 34,043 Ni 20 Nuai 1,897.02
Mamit 20,157 Ni 20 Nuai 1,056.08
Saiha 13,351 Ni 17 Nuai 665.61
Serchhip 13,724 Ni 21 Nuai 779.67
State Cell Nil Nil Nuai 117.95
Total 1,80,300 Ni 164 Nuai 10,166.71
Note: State Cell hi Secretariat-a MGNREGA-a thawktute hlawh leh ṭul danga hman sawina a ni.


Share this Post

Login to comment
No Comments