Thu dik lo thehdarh lo turin ngen

Lunglei Sub-Headquarters YMA chuan nimin khan hriattir tichhuakin, H Lalramdinpuii thattua puh Denghmingthanga, Mualṭhuam North, Lunglei Police Station aṭanga tlanbo chu nizan dar 6:45 thleng khan hmuh a la nih loh thu an tarlang a, hemi chungchangah hian thu dik lo thehdarh lo turin mi tin an ngen.

YMA Sub-Hqrs Lunglei chuan, "H Ramdinpuii tualthihnaa pawikhawihtua puh Denghmingathanga, Mualṭhuam North chu zanin (September 1) dar 6:45 thleng hian Police-te leh SYMA hnuai branch-ten theihtawpin an dap chungin hmuh a la ni lo," an ti.

Social media-ah thuthang a tam thu sawiin Lunglei YMA chuan, "Hmuh tawh a nih thu a darh tih kan lo hria a, hei hi thu dik lo a ni. Social media-a thu lêngvâkah mipuite chî-âi lo tur leh, thu chiang chu thuneitute'n an puan hmaa mahni ngaihdan lo vawrh darh lo turin kan inngen bawk," an ti. Denghmingthanga'n a tlanbo laiin kutkawl a bun thu leh, a chungchangah mit leh beng chhi a, a ṭul anga Police leh YMA hruaitute hriattir turin mipui an ngen bawk.