LESDE hmalakna leh hmachhawpte thlirho

Labour, Employment, Skill Development and Entrepreneurship (LESDE) minister Lalnghinglova Hmar hoin nimin khan department hotute'n LESDE department hmalakna leh hmachhawpte an thlirho. Minister chuan, rah ṭha chhuah thei turin kal dan thlak ngaite a awm theih chu a sawi.

Lalnghinglova Hmar chuan, kawng hrang hranga LESDE department hmalaknate chu ṭha thawkhata a hriat thu a sawi a, "Sorkarah chuan fimkhur taka kal a ngaih avangin muang ruih angin a lang ṭhin. Kan kan kal dan ngai renga kan kal chuan result ngai reng kan nei dawn a, a ṭhenah chuan result ṭha zawk nei turin kal dan thlak hret a ngai maithei. Chumi tur chuan rilru leh thâ sen belh hret pawh inhuam ila, kan vaia kan thawh belh hlek chuan rei lo teah department hmel thar ṭha zawk a lang ngei ang," a ti.

Industrial Training Institute (ITI) chu kut themthiam zirna pawimawh a nih avangin tihchangkan a ṭul thu sawiin Minister chuan, "Mizoram Building & Other Construction Workers Welfare Board-a labour cess tlingkhawm pawh danin a phal chhungah chak zawka hman dan ngaihtuah a ngai. Board member-te tan hamṭhatna tam tak a awm a, hei hi a tam thei ang berin hria se kan duh a, theihtawpa tihlar zel kan tum," a ti a; kut hnathawktu (labour) fate’n zirna leh eizawnna ṭha zawk an neih theih nan nasa zawka hmalak an tum thu a sawi.

Ṭhutkhawmah hian LESDE department hnuaia subordinate office hrang hrangte hnathawh dan leh kalpui mekte thlirho a ni a; ṭhalaite hamṭhatna, eizawnna, kut themthiamna leh mahni kutkea dinna kawng inkawhhmuh lama hmalaknate chak zawka kalpui dan tur an rel. LESDE department hnuaia iGOT Karmayogi Platform-a perform ṭha award leh best attendance certificate hlan a ni bawk.