Mizoram School League tlangzarh; 'Fai hi hmasawnna tehfung langsar hmasa a ni' - UDPA Minister

Swachha Bharat Mission 2.0 hnuaia Mizoram puma faina leh thianghlimna lama sikul inelna tur 'Mizoram Green Schools League' chu nimin khan UDPA minister K Sapdanga'n UDPA auditorium-ah a tlangzarh a; Minister chuan, fai chu hmasawnna tehfung langsar hmasa a nih thu a sawi.

Mizoram Green Schools League hi October 12, 2026-ah kalpui ṭan tur a ni a, December 18, 2026 thleng a awh dawn. League-in a tum chu - sikul zirlaite hnena bawlhhlawh thlian hran zirtir, hman khat daih sarang hmang lo tura inzirtir, ni tin nuna fai duhna seng luhtir leh, fai tura hmalakna hrang hranga hruaitu ni tura zirtirte a ni.

K Sapdanga chuan, leilung chu tuna mite'n thlahtute aṭanga an rochun a nih thu sawiin, "Kan tu leh fate tan kan luah hawh a ni tih ngaihdan zahawm tak kan pawm ang a, pawm turin sikul naupangte kan zirtir ang. Fai hi hmasawnna tehfung langsar hmasa ber a ni a, tuna fai hi kan duhtawk lo a, zirlaite hian fai an nunpui ang a, an nu leh pate min zirtir ang. An naute hnenah nghet takin chu rilru chu an tuh ang tih hi he intihsiaknain a tum ber a ni," a ti.

League tlangzarh a ni chu lawmawm a tih thu sawiin K Sapdanga chuan, "Sikul naupangte'n faina leh thianghlimna an ngainat a, an puitling thlenga an ni tin nunah fai duhna an nunpui theihna tura inzirtirna ṭha tak a ni dawn. Inelna hian lawmman sum eng emaw zah a kang tel hi a lawmawm rualin, lawmman dik tak zawk chu sikul hrang hranga zirlaite'n fai duhna thinlung an pu tur hi a ni," a ti a, faina chu mi tin mawhphurhna a nih thu a sawi.

Khualzahawm Education minister Dr Vanlalthlana chuan, tunlaiin fainaah ṭhalaite an ṭhangharh nasaa a hriat thu sawiin, "Mahni thua mimal leh ṭhianho ṭangruala hmun ṭawp leh bâl laite tifaia che chhuak an awm ṭhin. Mizoram Green School League hlawhtlinna turin kan department chuan theihtawp kan chhuah dawn. Faina kawngah zirtirtute leh sikula thawk zawng zawngte zirlaite tana entawn tlaka an awm a pawimawh," a ti.

Mizoram Green Schools League hi block level, district level leh state level-a kalpui tur a ni. State level-a pakhatnain Rs 1,00,000, pahnihnain Rs 70,000 leh pathumnain Rs 50,000 an dawng dawn a; district level-a pakhatnain Rs 10,000, pahnihnain Rs 7,000 leh pathumnain Rs 5,000 an dawng ang.

Block level-a ti ṭha zual pangate district level intihsiaknaah an tel ang a, district level-a ti ṭha zual pathumte state level-ah an inel leh dawn a ni.