Electronic vaccine carrier 30 inhlan

SELCO Foundation chuan nimin khan Mizoram sorkar hnenah electronic vaccine carrier (EVC) 30 an hlan a, sorkar aiawhin Health minister Lalrinpuii'n a dawng. EVC-te hi Lunglei, Lawngtlai leh Mamit district-tea hman tur a ni.

Health Minister chuan, SELCO Foundation-in health centre 530-ah solar energy an dah tawh tih sawiin, "Aizawlah 10MT walk-in cooler an siam tawh a, EVC 30 lai district pathuma hman tur an rawn pe leh hi kan lawm tak zet. EVC-te hi health & wellness centre leh sub-centre awm lohnaa nu leh naupangte tan hri laka himna leh hriselna thlentu a nih ngei ka ring," a ti.

Mizoram chu tlang ram a nih avangin hmun kilkhawr leh tlawhpawh harsa tak tak a awm thu sawiin Lalrinpuii chuan, "EVC-te hi darkar 35 chhung 2°C - 8°C inkara vaccine vawn ṭhat theihna a nih avangin hmun kilkhawr zawka awmte tan a hun taka vaccine an lak theih nan a ṭangkai dawn hle," a ti. Health department-in HPV vaccine immunization chu state pumah 100.4% an tihhlawhtlin tawh thu a sawi bawk.

SELCO Foundation-in Mizoram sorkar hnena an pek EVC-te hi ken kual awlsam leh zângkhai, solar hmang a ni a, pakhat Rs 1,50,000 man niin, a vaiin Rs 45,00,000 man a ni.