Ruihhlo donaa hmalakna sawiho a ni

Serchhip district bawrhsap Paul L Khuma kaihhruaiin August 31, Thawhṭanni khan District NCORD an ṭhukhawm a, ruihhlo donaa hmalakna leh hmachhawpte an sawiho.

Tarlan danin, Serchhip police-te chuan June 25 aṭanga August 31, 2026 thleng khan rakzu litre 918.5 leh ruihhlo kaihhnawihah mi pasarih an man. BSF-te nen joint patrolling neiin, Lungkawlh (border area)-ah heroin hawng 91 an man bawk. August thla laihâwl aṭangin ni tin zirna-in leh hmun hrang hrangah Anti-Drug Awareness Campaign an nei a, mi 1,300 chuangte an tel a ni.

NCORD hnuaia din Special Investigation Team (SIT) chuan ruihhlo hluarna hmunahte joint patrolling an nei ṭhin a, Pathianni leh zan tin ruihhlo an vài ṭhin bakah, vaihlo leh ruih theih thil dangte do nan zirna-in hrang hrangah thla khatah vawi hnih surprise check a nei ṭhin. Naupangte pualin ruihhlo ṭhat lohzia zirtirna atan reels insiamsiak an buatsaih bawk.

June 25 - August 31, 2026 chhung vek khan Excise & Narcotics department chuan heroin gram 0.76 leh alprazolam gram 90.3 an man a; Food and Drugs Administration pawhin dan loa damdawi hralh ṭhin damdawi dawr pahnih license an titawp lailawk a, dawr paruk chu an vau a, insawifiah turin dawr 13 an hriattir a ni.

Health department chuan Serchhip district-a sikul pakuah vaihlo, ruihhlo leh HIV chungchangah awareness programme an buatsaih a; Serchhip District Hospital-a doctor-te’n District Jail-a táng zinga damlo 62 an enkawl a, September aṭang hian thla tin Jail hi an tlawh ṭhin dawn.

Serchhip Sub-Headquarters YMA hnuaia Anti-Drug Squads chuan zu litre 151, heroin hawng 9 leh pregabalin tlêp (strip) 72 an man a, henga inhnamhnawih mi 12 leh lirtei pakhat an man bawk.