Mizorama lut tur lirthei Assam-a dan Mizoram Tipper JAC-te'n an dem

Mizoram Tipper Joint Action Committee (MTJAC) hruaitute chuan nimin khan thuthar thehdarhtu ṭhenkhat an kâwm a; Silchar Truck Driver Association (STDA)-in Mizorama lut tur lirthei an dang chu an dem thu an sawi.

MTJAC-ah hian All Mizoram Commercial Tipper Association Owner's and Driver's (AMCTA), Mizoram Tipper Association (MTA) Gen. Hqrs., Aizawl leh MTA Kolasib District te an tel a ni.

MTJAC hruaitute chuan, August 19, 2026 khan AMCTA pisaah Lailapur Truck Driver Association hruaitute nen joint meeting an neih thu an sawi a, "Bagha balu hi mahaldar-in permit a renew hunah Kolasib-ah inbiakna neih leh ni se tih a ni a, mahaldar leh Lailapur Truck Driver Association te nen inremna neih ni se, kan tih laiin August 30, 2026 zan dar 6 aṭang khan Silchar Truck Driver Association-te'n Bagha-ah road block an lo nei hi hriatthiam harsa kan ti hle," an ti.

Balu thiar chungchanga an dinna sawiin MTJAC chuan, "Kum 2018-ah khan Vairengteah DC hoin MTA leh STDA chuan tualchhung balu, tualchhung vêka hralh nghal (local trip) inchuhpui lo turin inremna kan siam. Assam-ah khuan balu kan la thei a, mahse, Assam chhungah kan hralh ve thei lo a, Mizorama phurh tlang chiah phal a ni," an ti a; chutihlaiin, Mizorama balute chu Assam lam mite'n Mizoramah vêk an hralh ṭhin thu leh, chu chu tun hnaiah MTA-in an phal loh ve tâk thu an sawi.

MTJAC hruaitute chuan, an hmalakna chu Mizoram tan a nih thu sawiin, "Aizawl leh hmun danga balu leh a kaihhnawiha sumdawnna liante hi hnam dang ta deuh vek a ni a, tuna kawng an block pawh hi Mizorama hnam dang sumdawngte inthurual hmalakna a ni. Kan pawl leh mimal hamṭhatna atana hma la kan ni lo a, kan tu leh fa, lirtheia sumdawng tur emaw, dawrkai tur emaw te hmakhaw ngaiin hma kan la a, hei hi Mizoram mipui hian min hrethiamin, min thlawp tlat se kan duh," an ti.

MTJAC THU LEH HLA

■ Assam-ah balu kan la thei a, Mizoramah bâk kan hralh thei lo. Mizorama balute Assam mite'n an lak kan phal a, mahse, tun hnai aṭangin Mizorama an hralh kan phal lo ve ta.

■ Mizorama Assam lam mi, balu leh a kaihhnawih sumdawnna neite'n Mizo lirthei hmanga Mizoram balu lak an duh lo a, kawhmawh báwlin Mizorama lirthei lut turte Assam-ah an dang.

■ Balu leh a kaihhnawih hmanga Mizorama sumdawngte hi Karimganj lam mi deuh vek an ni a, Karimganj Truck Driver Association hian tun hnai tê khan Silchar Truck Driver Association-ah membership fee pein, hetiang hian hma an laho a ni.

■ Kawng block-ah hian Mizo lirthei eng emaw zat an táng tih kan hria a, a pawi hle; kawng an block hma khan an mi leh sate Mizoram aṭangin an ko thla hmasa vek.

■ Inremna awm thei lo zawnga hma an la zel dawn a nih chuan kan NGO-te sawmin theihtawp chhuahin hma kan la ve dawn a; dik taka dan hnuaia thil tih duh kan nih avangin kan hlau lo.