Thuneitute'n lei minna hmun enfiah

Serchhip additional DC Dorothy Muansangi hoin nimin khan PWD hotu te, Serchhip Sub Headquarters YMA hruaitu te, Darnam VC leh ram neitute’n Serchhip leh Thenzawl inkar, Colney Filling Station thlanga leimin an tlawh a, hmalak theih dan tur an enho.

Lei minna lai hi PWD-te'n JCB hmangin (on-call) an vil reng a; chhiatna lian tham a thlen loh nan zan lamah tlan tam lo tur leh fimkhur turin mipui an chah a ni.

Sorkar thuchhuah tarlan danin, lei minna hmun hi Serchhip district mipui bakah, Mizoram chhim lam khuate tan inkalpawhna kawng pawimawh a nih avangin thenfai tumin hmalak ni ṭhin mah se, a mualin a zir tâwk loh avangin ruah a sur chângin a min belh ṭhin a; ram a tihhêk zel avangin ram neitute pawhin complaint an thehluh tawh bakah, PWD Chief Engineer hoin an enho tawh a ni.