Rinpuii'n Presidency University a tlawh

Minister Lalrinpuii chuan nimin khan Bangaluru-a Presidency University a tlawh a, zirlaite hmaah thu sawiin, entawn tlaka awm turin a fuih.

Lalrinpuii hi Presidency University chancellor Dr Nissar Ahmed, vice chairperson Dr Nafeesa Ahmed, vice chancellor Dr SJ Thiruvengadam, pro vice chancellor Dr Vidya Shankar Shetty leh hotu dangte'n an lo dawngsawng a, thawkutte leh zirlaite nen inkawmhona hun hman a ni.

Minister chuan, zirlaite chu an zirnaah duhsakna hlanin, entawn tlaka awm turin a fuih a, "Zirna sang hi degree neihna tur ringawt a ni lo a, mi rintlak ni tura min chhertu a ni. India hi ṭhalai tamna ram a ni a, ṭhalaite hian India ram hmasawnna tur leh dinchhuahna turin ke kan pên zel tur a ni," a ti.

Zirlaite chu nun uluk tur leh an mawhphurhna hre renga nun hmang tur te, ruihhlo leh thil ṭha lo dang laka fihlim tur te, technology hrang hrangte an zirna atan leh hmasawnna atan hmang ṭangkai turtein Lalrinpuii chuan a chah bawk.