Minister-in PACS hnenah computer a hlan

Cooperation minister PC Vanlalruata chuan nimin khan Cooperative Societies Registrar conference hall-ah Computerisation of Primary Agricultural Credit Cooperative Societies (PACS) Phase-III hnuaia PACS 50 hnenah computer a hlan.

PC Vanlalruata chuan, Cooperation department-in theihtawp an chhuah avangin MPACS-te hnenah computer sem a nih thu sawiin, "Sorkar laipui leh Mizoram sorkar chuan PACS-te an ngai pawimawh a, PACS-te hi Mizoram hmel tidanglam theitu an ni," a ti a, computer an dawnte ṭangkai taka hmang turin a chah.

Cooperative movement-ah ṭhalaite an pawimawh thu sawiin Cooperation Minister chuan, theihtawp chhuah zel turin a fuih a, "Thawhhona ṭha neih a pawimawh a, Mizote hi thawkho thiam tak kan ni," a ti.

Ministry of Cooperation hnuaiah Computerisation of PACS Project kalpui mek a ni a, Phase III-ah hian PACS 50 hnenah computer pek a ni. Phase-I leh Phase-II hnuaiah PACS 49 hnenah computer pek a lo ni tawh bawk. Computer-te hi GeM Portal kaltlanga lei a ni a, supplier chu Synergy Systems, Dimapur, Nagaland a ni.