Saitual Master Plan sawiho a ni

Saitual Town Planning & Development Committee chu nimin khan bialtu MLA Prof. Lalnilawma, minister of state hoin an ṭhu. Minister chuan, Saitual Master Plan siam tura hmalak mekah ruahmanna awm sa rinchhanin ramri rîn a nih tawh thu a sawi.

Prof. Lalnilawma chuan, Saitual Town Planning & Development Committee-in a ruahman tawh angin Saitual Master Plan siam turah hmalak mek a nih thu a sawi a, "Ruahmanna awm sa rinchhanin ramrite rin tawh a ni a, he Action Plan hi kum 2046 tinzawn chunga siam a ni dawn. Ram intodelh leh hmasawn ni tura sorkar laipui hmalakna Viksit Bharat 2047 atan pawh a ṭangkai hle dawn a ni," a ti.

Saitual Master Plan-in a kaihhnawih sorkar department leh village council te chu action plan siamah theihtawp chhuah zel turin Prof. Lalnilawma chuan a fuih a; Saitual mipui tan kawng hrang hrangah hmasawnna a thlen ngei a beisei thu a sawi bawk.