ISI mark chuang gas pipe chauh hmang turin mipui chah

Food, Civil Supplies & Consumer Affairs (FCSCA) department chuan thuchhuah siamin, eirawngbawlna gas pipe ṭha leh rintlak, ISI mark chuang chauh hmang turin mipui an chah.

FCSCA department chuan, India rama gas vanga chhiatna thleng tam ber chu a hmangtu inthlahdah vang te, gas chungchang hriat chian tâwk loh vang te, hmanraw hman tur dik tak hman loh vang te, hmanraw him tawk lo hman ṭhin vangte a nih tlangpui thu an tarlang a, "Heng harsatna awm thei hrang hrang Mizorama zir chian a nih hnuah LPG hmangtu (consumer)-te'n gas pipe (hose pipe) hman tur dik ni lo, ISI chuang ni lo, bazar vela a man tlawm zawk kan hmang tam hle tih hriat a ni," an ti.

Hmanraw ṭha tâwk lo leh him lo hmanin chhiatna nasa zawk a thlen theih thu tarlangin Supply department chuan, gas hmangtute chu gas pipe (hose pipe) ṭha leh company pawmpui ngei hmang turin an chah a ni.