VB-G RAM G inhrilhfiahna buatsaih; 'Mipuiin hlawk takin chhawr se ka duh' - Rural Development Minister

Rural Development department chuan nimin khan IPR confe-rence hall-ah MGNREGA thlaktu VB-G RAM G inhrilhfiahna, 'Orientation on Viksit Bharat: Guarantee for Rozgar and Ajeevika Mission (Gramin)' an buatsaih a; khuallian RD minister Prof Lalnilawma chuan, VB-G RAM G chu mipuiin hlâwk takin chhawr se a duh thu a sawi.

Prof. Lalnilawma chuan, sorkar laipuiin inhlawhna a buatsaihah mipui chawikan chu a tum pakhat a nih thu sawiin, "Inhlawhna chu a awm mai a, mipuite chawikan an ni em tih ngaihtuah a ngai. VB-G RAM G hi mipuite'n hlawk takin chhawr ngei se ka duh," a ti a; official leh khawtlang hruaitu kal khawmte chu hna ṭha taka thawk zel turin a chah.

Inrêlbâwlna langtlang leh hmasawnna sorkarin a ngai pawimawh thu sawiin Minister chuan, "Kan term chhungin labour budget-ah kum hnih chhung ni 100 inhlawhna daih dah ve ve a ni. Kuminah chuan VB-G RAM G-in MGNREGA a thlak dawn avangin normal allocation hmanga pawisa inpek tur a ni a, kan dawn zat tur a la hriat loh. Ni 125 inhlawhna chu a daih ngei beisei ang," a ti.

RD Minister chuan, VB-G RAM G tum pawi-mawh tak chu, ram pum huapa hmasawnna ngêlnghet neih a nih thu sawiin, "Viksit Bharat@2047 atana mi tinte leh department hrang hrangte inpuahchah nasat a ngai," a ti a, thingtlang khaw tinte mahnia intodelh tura theihtawp an chhuah a pawimawh thu a sawi.

Prof. Lalnilawma chuan MGNREGA an kalpui ṭhin danah duhthusam a ni em tih te, thingtlang mite MGNREGA scheme kaltlang hian an chhawmdawl ṭha tâwk em tihte ngaihtuah lêt a ngaih thu a sawi a, "Thlen chin aṭangin hmasawn zel a ṭul. VB-G RAM G-in a ngaih pawimawh water security pawh department hrang hrangte'n nasa zawka an thawhho a pawimawh," a ti.

VB-G RAM G hi July 1, 2026 aṭangin India ram pumah hman ṭan tur a ni a, inbuatsaihna kal zelah state level aṭanga village level thlengin orientation leh public outreach (jan samvaad) neih mek a ni. Mizoramah pawh inbuatsaihna nasa taka kalpui a ni a, The Mizoram VB-G RAM G Scheme, 2026 chu Council of Ministers-in pawmin, tihchhuah tawh a ni.

Mizoram hi India rama VB-G RAM G kalpui dan tur chhuah hmasa ber state a ni a; VB-G RAM G hnuaia ni 60 chhung chawlhna (seasonal pause) chungchang pawh Mizoram chuan ruahmanna leh hmalak dan tur a duang tawh. Seasonal pause chhung hian VB-G RAM G-a hna reng reng thawh phal a ni lo a, thingtlang mite'n buh tuh leh seng laia anmahni leh mi dang hnena an inhlawh theihna tura seasonal pause hi duan a ni.