KHAWTHLIR

Tea Processing Unit MLA-in hawng

Hnahthial District Rural Development Office (DRDO)-in WDC-PMKSY 2.0 hnuaia South Chawngtui khuaa Tea Processing Unit an din chu June 1, Thawhṭanni khan bialtu MLA Jeje Lalpekhlua'n a hawng. Jeje Lalpekhlua chuan, hun lo kal lehzel turah South Chawngtui khua chu thingpui thar chhuak tam leh thingpui tuina khua an nih a beisei thu a sawi.

MP hoin ṭhukhawm

Lok Sabha MP Richard Vanlalhmangaiha hoin nimin khan Kolasib District Development Coordination and Monitoring Committee an ṭhukhawm a, sorkar laipui scheme hnuaia hmalakna leh hnathawhte thlirho a ni. Richard Vanlalhmangaiha chuan, department hrang hrangte'n theihtawp chhuaha mipui tana hma an la ṭhin chu fakawm a tih thu a sawi a, "Mizoram hmasawnna hi a taka hna thawktu department-te kutah nasa takin a innghat a ni," a ti. Ṭhutkhawmah hian department hrang hrangten October 2025 atanga March 2026 inkar chhunga an hmalaknate an tarlang.

Zonu-in lawmpui

ZPM Zonu General Headquarters chuan nimin tlai khan Aizawl deputy mayor R Lalawmpuii lawmpuina leh an president hluite pahnih R Lalawmpuii leh C Sangzuali te thlahna hun Hotel Regency-ah an hmang a, ZPM president mawhphurhna la mektu Lalduhoma, chief minister-in a hmanpui. Inkhawm hi Zonu president thar Dr C Malsawmtluangi'n a kaihruai a, Lalduhoma leh R Lalawmpuii ten thu an sawi.

Dan duan sawiho

Commerce, Industries, Geology & Mining secretary Dr H Lianzela hoin nimin khan Secretariat conference hall-ah 'The Draft Mizoram Trade and Enterprises (Formalization and Facilitation) Bill, 2026' chungchanga inrâwnkhawmna buatsaih a ni a, sorkar hotu te, pawl leh khawtlang hruaitute an tel. Kal khawmte chu an ngaihdan leh rawtnate ziakin June 30, 2026 ral hmaa Commerce, Industries, Geology & Mining department-a thehlut tura ngen an ni.