Sawhthing qtl 27,320.98 lei/hralh tawh: 2025-a hralh zat aṭangin 8.07% vel a ni

Mizoram Agriculture Marketing Board (MAMB)-in Mizorama thar sawhthing lei leh hralhna tura a ruahman secondary collection centre (SCC) 64 zinga 30-ah sawhthing quintal 27,320.98 lei/hralh a ni tawh a; kumina sawhthing lei/hralh tawh zat hi kum 2025 chhunga sawhthing lei/hralh zat aṭanga chhûtin 8.07% vel a ni.

State sorkarin February 2, 2026 aṭangin SCC kaltlanga sawhthing lei/hralh hun a hawng a, ruahman dan chuan May 30, 2026-ah a tawp dawn. Vanglaini thu dawn danin, April 5, 2026 thleng khan SCC 64 zinga 30-ah sumdawngte'n kut hnathawktute sawhthing an lei tawh a; SCC 30 aṭang hian sumdawngte hian sawhthing qtl 27,320.98 (kg 27,32,098) lei tawhin, Rs 7,96,44,342.40 man a ni.

Sawhthing hi SCC hrang hrangah a man (rate) a inang lo a, sorkarin a báa lei a phal loh avangin sumdawngte hian sawhthing an leina man hi kut hnathawktute hnenah an pe nghal zel a ni.

Kut hnathawktute'n sawhthing an hralhna man sumdawngte aṭanga an hmuh tawh chu cheng vbc 79.64 a ni a; Mizoram sorkar rate bithliah (kg-ah Rs 50) a tlin lohnaah sorkar aṭangin support price an la hmu dawn bawk. Tun dinhmuna sorkarin support price a pek tur zata chhût chu Rs 5,69,60,558 a ni.

Kum 2025 khan kut hnathawktute'n sawhthing qtl 3,38,351.82 an hralh a, sorkarin sawhthing lei nan cheng vbc 141 vel a sêng. Kumina sawhthing hralh tawh zat quintal 27,320.98 hi nikuma hralh zat aṭangin 8.07% a ni.

Kumin hian Khuangleng SCC-ah sawhthing quintal 10,856.72 hralh tawh niin, hralh tam berna a ni a; a dawttu West Phaileng SCC-ah quintal 2,147.11 hralh a ni tawh. Sawhthing lei/hralh hun tura bituk February 2, 2026 aṭanga April 5, 2026 thleng khan SCC 64 zinga 30-ah sawhthing lei/hralh a ni tawh a, SCC dang 34-ah sawhthing lei/hralh report a la awm lo.