NCC national camp-a telte lawmpui

Governor Gen. Vijay Kumar Singh chuan nimin khan Lok Bhavan-ah Mizoram aṭanga national camp-a tel National Cadet Corps (NCC) cadet 19-te lawmpuina a buatsaih a; chief minister Lalduhoma, Sports & Youth Services minister Lalnghinglova Hmar leh MLA Lt Col. Clement Lalhmingthanga ten an hmanpui.

Larsap chuan, Mizorama NCC din thar zelnaah hmasawnna thar a hmu chu phûrawm a tih thu a sawi a, "NCC group headquarters Aizawla hawn thar a ni leh hemi hnuaia Mizoram NCC unit zawng zawngte ṭha taka kalpui a ni hi a lawmawm, hemi avang hian ṭhalai tam zawkin NCC an zawm belh ka beisei. India ram NCC cadet sang chuang zingah fiahna hautak tak paltlanga national level camp-a tel thei cadet 19 Mizoramin a neihte hi an chhuanawm hle a ni," a ti.

NCC Group HQ Aizawl hnuaiah 3rd Wing ni turin Naval Wing din a duh thu sawiin Gen. VK Singh chuan, a hlawhtlin thuai theih nan group commander chu chak taka hma la turin a chah a; NCC cadet-te chu tun aia nasa zawka ṭan la turin a fuih bawk.

Governor leh Chief Minister te hian national camp-a tel NCC cadet-te hnenah chawimawina thilpek an hlan a, an tawnhriatte zawtin an kâwm nghal.

NCC national camp neih zawh takah Mizoram aṭangin cadet 19 an tel a; chungte chu 20 Mizo Bn. NCC aṭangin mi pahnih, 1 Mizo Bn. NCC aṭangin mi pakhat, 1 Mizo Air Sqn NCC aṭangin mi pariat leh 2 Mizo Bn. NCC aṭangin mi pariat an ni.