KHAWTHLIR

Mimal lirthei hmang

Transport minister Vanlalhlana chuan nimin khan Assembly House-ah BJP member Dr K Beichhua zawhna chhangin, Government of Mizoram Vehicle Outsourcing Policy, 2019-in a phal angin sorkar mamawha hman atan mimal/agency/empanelled firm lirthei hman a nih ṭhin thu a sawi a, "He policy hi Motor Vehicle Act behchhana duan a ni lo a, GAD-in notification a siam anga kalpui a ni," a ti.

Pension tawh rawih nawn an ni

DPAR minister K Sapdanga chuan nimin khan Assembly session-ah MNF member K Laldawngliana zawhna chhangin, a chhan (case) azirin sorkar hnathawk pension tawh rawih nawn an awm thu a sawi a, "Pension pawhsei an awm hranpa lo. Amaherawhchu, ṭul bik thilah, thiamna bik nei thilah chuan hlawh tlemtêin rawih nawn ṭhahnem tak an awm," a ti.

Hulhliap training

Sorkarin ruihhlo ngaite puala Hulhliap Short Stay Centre a buatsaih aṭanga chhuakte tana MFM Skill Training Centre-a a thlawna thiamthil zirnaa zir chhuakte chu nimin khan certificate hlan an ni. Training hi Hulhliap SSC aṭanga chhuakte'n eizawnna an neih theihna tura buatsaih a ni a, nimina thlahte hi assistant electrician zir chhuak mi 14 leh aluminium fabrication zir chhuak mi 21 an ni.

MADA free clinic

Mizoram AYUSH Doctors Association (MADA) chuan nimin khan Baktawngah a thlawna hriselna endikna, Free Medical Clinic an buatsaih. Clinic-ah hian AYUSH doctor 25, State Medicinal Plants Board leh MSACS aṭangin mi eng emaw zat an thawk chhuak a, Baktawng leh a chhehvel khua aṭangin mi 200 vel an inentir a, a thlawnin damdawi an pe a ni.

Kawng khar

Traffic SP C Vanlalvena chuan thuchhuah siamin, Vaivakawn Traffic Point aṭanga Kanan Veng Presbyterian Church, Middle Kanan inkar kawngah Ace Alliance Pvt. Ltd. ten tuichhe paihna pipe phum hna an thawh dawn avangin nimin aṭanga hna thawh zawh hma chu zan tin dar 9 aṭanga zing dar 5 thleng helai kawng hi khar ṭhin tur a nih thu a tarlang.