Kan budget aiin kan leiba tur a tam zawk dawn - Dr Thangtea

Nimin khan Assembly session-ah budget sawiho a ni a; MNF member Dr R Lalthangliana chuan, kum 2026-27 Mizoram budget chu leiba tur aiin a tlem zawk thu a sawi.

Leader of Opposition a awm loh vanga a aiawha thusawitu Dr R Lalthangliana chuan, kum 2026-27 budget chu leiba tur aia a tlem zawk thu sawiin, "Hetiang hi kan hre khát khawp mai. Thil serious tak niin kan hria. Budget aia leiba tamna hi cheng vbc 2,008.23 a ni a, thil mak tak a ni," a ti.

Dr R Lalthangliana chuan, kum 2026-27 budget chu deficit budget a nih thu sawiin, "Hei hi chu i pawm tlâng ang u. Revenue Expenditure 82.53% a nih laiin, mipui chanvo, hna thawhna tur Capital Expenditure-ah 17.74% chauh dah a ni," a ti a; ZPM sorkarin mipui chanvo a ngaihthah tih a lan chian thu a sawi.

Sorkar sum enkawl­naah hlawhchham leh hlawh­chham loh tehna bik a awm thu sawiin R Lalthangliana chuan, "Inpáwng hnial vak vak a fel lo. FRBM Amendment Act, 2006-in tehfung a nei a, an tehfung aṭangin a chiang ṭhin. Kan in ennawnna tur kan darthlalang pawimawh a ni," a ti.

Dr R Lalthangliana sawi danin, FRBM Act target ang chuan fiscal deficit chu GSDP aṭanga 3% tur a nih laiin, kum 2024-25 (BE)-ah chuan fiscal deficit hi GSDP aṭanga tehin 5.6% a ni a, kum 2025-26 (RE)-ah 7.56% a ni.