Pawl pali hruaitute'n NHIDCL hotu an hmu

Mizoram Transformation Movement, Centre for Environment and Social Justice, Mizoram First leh Citizens Alliance for Truth and Social Justice hruaitute chuan nimin khan NHIDCL executive director Virendra Kumar Jakhar chu a pisaah an hmu a; Kawnpui-Sairang inkara kawng chhe lutuk chungchang an sawipui.

Pawl pali hruaitute chuan, Kawnpui-Sairang kawng chhiat lutuk vangin lirthei a tluk ṭhin thu leh Mizoram chhunga khawsak a buai phah thu an sawi tih an tarlang a, "Thu chiang zawk leh hna thawh an tum dante zawtfiahin, ṭha tak leh rang takin, lirthei kal harsatna a awm lohna tura hma la turin ngenna leh hriattirna kan pe a ni," an ti.

Virendra Kumar Jakhar chuan, kawng chhia a hriat thu sawiin, siam turin hma an lak mek thu leh theihtawp chhuah an tum thu a sawi a; fûr ruahtui tlak chhung chuan blacktopping an tih theih rih dawn loh tur a sawi bawk.

Khamrang-Kawnpui inkar leh Bilkhawthlir-Kolasib inkar chu Mizoram PWD hnen aṭanga lak thuai an tum thu leh, kawng siam tura harsatna an tawh forest clearance chu tunah chuan an neih tawh thu a sawi a, "Amaherawhchu, thing dingte Forest department-in an kih leh senghawi tur a nih avangin tun thlengin hna tak tak kan la thawk thei lo," a ti.

National Highways & Infrastructure Development Corporation Limited (NHIDCL) hian Mizoramah national highway km 921 an enkawl mek a ni.