Serchhip dist-a hri danna pek dan sawiho

Serchhip District Task Force for Immunization chu an chairman Paul L Khuma, bawrhsap kaihhruaiin nimin khan an ṭhukhawm a, hmalak tawhna leh hmachhawpte an thlirho.

Tarlan danin, kum 2024-25 khan Serchhip district-ah naupang hri danna pek tur zata aṭanga 96.24% hnenah hri danna pek a ni a, nau pai 89.76% hnenah sakawr-êkhrik (tetanus) leh diphtheria (hrawk na pui) hri danna pek a ni.

December 7, 2024 aṭanga ni 100 chhung TB campaign neihah Serchhip district-a ngawr (tuberculosis) vei thei dinhmuna ding (vulnerable population) endik tur target mi 9,863 a nih laiin, mi 11,094 endik an ni a; TB vei mi pathum hmuh chhuah a ni.

Serchhip district-a a kum záwna TB Free Village ni thei Hmunṭha khuain silver status an dawng a, a kum khatna atana TB Free Village ni thei - Bungtlang, Lungpho, Ngèntiang, Lungkawlh, Sailulâk, Léng, Khumtung leh Serchhip Field Veng ten bronze status an dawng.

Stop Diarrhoea Campaign kalpui mek niin, Serchhip District Hospital, primary health centre, health and wellness centre, sub centre leh clinic-ahte Oral Rehydration Treat-ment Corner dah vek a ni a; heng hmunah hian a mamawh tan Zinc leh ORS lak theih a ni.