Serchhipah thlai lei leh hralhna khâr

Serchhhip District Agriculture Marketing Committee (DAMC) Paul L Khuma, bawrhsap kaihhruaiin nimin khan Bána Kaih (Handholding) kaltlanga thlai lei leh hralh khârna leh thlir letna hun hman a ni.

Ṭhutkhawm tarlan danin, sawhthing lei thawh khatnaah Serchhip district-ah sorkarin sawhthing kg. khat Rs 50-in a lei (direct purchase) a, sawhthing leina man chu loneitute bank account-ah thun a ni. Direct purchase-ah hian sawhthing quintal 8,845 lei niin, qtl 2,189 chu Sairang Buffer Stock-ah phurh a ni. SCC aṭangin buyer hnenah sawhthingte hralh leh niin, sawhthing hralhna aṭanga sum hmuh chu Rs 1,09,49,386 a ni.

A thawh hnihnaah support price pea kalpui a ni a, sawhthing hralh hna la kalpui mek a ni. Tun dinhmunah Serchhip district-a SCC pasarihin sawhthing quintal 51,342 an hralh tawh. Loneitute hnenah support price Rs 6,01,08,104 pek a ni tawh a, la pek loh cheng vbc 7.49 a la awm. Support prise la pek lohte invoice thehluh hun hnuhnung chu July 15, 2025 a ni.

Paul L Khuma chuan, sorkar hmalakna ṭha taka kalpui a ni chu a lawm thu a sawi a, "Loneitute bank account-ah cheng nuai 150 vel a lut dawn a, kut hnathawktute tan malsawmna a thlen ngei ka beisei," a ti a; kum thar lama chhunzawm a nih hunah DAMC member-te chu ṭang lehzual turin a fuih.